Tele ‘o le gaoi ‘ua ala ai ‘ona teu ‘i tua ‘o fata le pīsupo

Na fa’aalia ‘e nisi ‘o tagata Pasefika, ‘e lē tatau ‘i supamāketi ‘a ‘Aukilani ‘ona loka ‘apa pīsupo, ‘o se taumafa ‘e mo’omiaina tele ‘e tagata atumotu.

‘E iai nisi fale’oloa ‘e fa’apea ‘ua nanā pe teu ‘i tua ‘o fata ‘o fale’oloa, ‘ona ‘e gaoia.  ‘E tele ni pusa pīsupo ‘i supamāketi ‘a le Woolworth ‘i Māgele ‘i Sasa’e ma Te Atatū ‘i Saute ‘ua ‘ave’ese mai fata ‘o lo’o fa’atau atu ai, ‘ae ua teu ‘i tua.  ‘Ua lata ‘i le $8 le tau ‘o le ‘apa pīsupo ‘i le taimi nei.  Na fa’aalia ‘e le Woolworths New Zealand, lea ‘e ana le Countdown, ‘ua māfua lea faiga, ‘ona ‘o le gaoia ‘o lea ‘oloa.  ‘Ae ‘e fia fa’ailoa atu ‘i a lātou tagata fa’atau, ‘o lo’o tele lava le pīsupo ‘o lo’o maua ‘i a lātou fale’oloa. 

‘O le lua tausaga talu ai, sa taumafai mālosi ai lava le kamupanī ‘e faia ni polokalame ‘e fa’aitīitia ai le gaoi ma fa’aleleia ai fo’i le saogalēmū ‘o tagata faigāluega fa’apea tagata fa’atau ‘i totonu ‘o fale’oloa.  Na asiasi le vāega Pasefika ‘a le Leitiō Niu Sila ‘i le Woolworths Māngere East ma talanoa ‘i tagata fa’atau.  ‘O le tala ‘a se tasi tinā, ‘e lē tatau ‘ona faia lea gaioiga ‘o le nanā pe teu ‘i tua pīsupo.  ‘O le tūlaga lenā ‘o lo’o tupu ‘i Te Atatū, ‘ona ‘o lo’o ‘ave fa’agaoi ‘e nisi talu ai le taugatā.

‘O le tala ‘a nisi, ‘o se faiga fa’ailoga lanu.  ‘O ‘Aperila 2024, na lokaina ai se taule’ale’a ‘i lona gaoia ‘o ni ‘oloa ‘e $2000 le tau aofa’i, mai supamāketi ‘i ‘Aukilani.  Na saunoa Inspector Joe Hunter ‘o le ta’ita’i leoleo ‘i Counties Manukau South, ‘e iai lo lātou talitonuga, na ‘ave ‘e le taule’ale’a ni apa pīsupo se 20 mai le Woolworths ‘i Takanini ‘i le taeao ‘o se Aso Gafua.

Link to RNZ Pacific (Article) translated: https://www.rnz.co.nz/international/pacific-news/569001/corned-beef-conundrum-thefts-see-pacific-staple-moved-behind-the-counter

ATA: RNZ / Marika Khabazi