Taunu’u ‘i Niu Kaletōnia le ‘au malaga ‘o sui mai le fono ‘a ta’ita’i ‘o le Pasefika, le Pacific Forum

‘O lea ‘ua taunu’u atu ‘i Niu Kaletōnia, le ‘aumalaga, ‘o sui āloa’ia mai le Fono ‘a Ta’ita’i ‘o le Pasefika po’o le Pacific Islands Forum, ma ‘ua fa’ailoa mai ai ‘e fa’apea, ‘o lea faigāmalaga, ‘o lona fa’amoemoe ‘autū, ‘o le mata’itūina lea ‘o le tūlaga ‘o mea tau ‘upufai’omālō, ‘ātoa ma mea ‘o lo’o tutupu ma aliali mai ‘i totonu ‘o ia atumotu ‘o le Pasefika. ‘E tolu aso ‘o le ‘ā iai ‘i Niu Kaletōnia lenei ‘aumalaga, ‘o lo’o aofia ai le Palemia ‘o Tonga o Hu’akavameiliku Siaosi Sovaleni, ‘o le ta’ita’ifono, fa’apea le Palemia ‘o Fiti, ‘o Sitiveni Rabuka ma le Palemia ‘o le Atu Kuki ‘o Mark Brown.

‘O lo’o aofia fo’i ‘i lea ‘aumalaga ma le Minisitā ‘o le Vā ‘i Fafo ‘a le Atu Solomona, ‘o Peter Chanel Agovaka, ‘o lo’o fai ma sui ‘o le palemia ‘o lea atunu’u ‘o Jeremiah Manele, ‘aemaise ‘o le Failautusi ‘o le Forum ‘iā Baron Waqa ma ni sui sīnia mai lona ‘ōfisa. ‘O le ‘ā feiloa’i ai lenei ‘aumalaga ma sui ‘o vāega fa’aupufai’omālō ‘ātoa ma fa’alāpotopotoga ma nu’u na iloga ‘ona āfāina ‘i vevesi ma solo tete’e ia sā aliali mai ‘i le ‘a’ai ‘o Noumea ‘āmata mai ‘i le aso 13 ‘o le māsina ‘o Mē.

Link to RNZ (Article) translated by Lauano Ilaoa: https://www.rnz.co.nz/international/pacific-news/532091/pacific-leaders-troika-begins-new-caledonia-fact-finding-mission

ATA: RRB – Pacific Islands Forum troika delegation visits New Caledonia’s Congress President Veylma Falaéo as part of fact-finding mission.