Puipui ‘e le Palemia le ‘Parent Boost’ visa ‘a’o iai tu’ua’iga ‘i le lē aofia ai ‘o le Pasifika

‘O lo’o tausisi pea le Palemia Christopher Luxon, ‘o le pōlisi ‘o le Parent Boost visa, ‘o lo’o pāleni lava ‘e ui ‘i faitioga ‘e fa’apea ‘e tele ‘āiga Pasefika ‘e lē agava’a ‘i ai, ‘ae ‘o lo’o manuia ai ‘āiga mau’oloa.

Na fa’aalia ‘e Luxon ‘i le Pacific Mornings, ‘o le māfua’aga ‘o lea visa, ‘e lagolago ai ‘i tagata mai fafo ‘o lo’o naunau ‘e ‘umi ni taimi ‘e mafai ‘ona asiasi mai ai o lātou mātua.  ‘O le visa fou lea, ‘e mafai ai ‘e mātua ‘o tagata sitiseni Niu Sila ma tagata nofo mau, ‘ona tele taimi ‘e mafai ‘ona ulufale mai ai ‘i le atunu’u, ‘e o’o atu ‘i le lima tausaga.  Peita’i ‘o le manatu ‘o le ‘au fai tōfā ‘e aofia ai se lōia ‘i ‘Aukilani, Nalesoni Tupou, ‘o tu’utu’uga ‘i matā’upu tau tupe ma inisiua, ‘e mātua fa’atapula’aina ai lava fa’amanuiaga mō le tele ‘o ‘āiga Pasefika. 

‘O aiāiga ‘o lea visa, ‘e tatau ‘i le tagata talosaga, ‘ona lē ‘i lalo ifo ‘o le tasi le tausaga ‘o se inisiua ‘o le soifua mālōloina ‘e $250,000 mo ni fa’alavelave fa’afuase’i, $100,000 mō togafitiga ‘o le kānesa, ma nisi tau.  ‘E tatau ‘ona fa’atūmau pea le inisiua mo le taimi ‘ātoa ‘e nonofo ai mātua ‘i Niu Sila. 

‘E tatau fo’i ‘ona fa’amalieina tu’utu’uga tau tupe: ‘o le tagata lea ‘e lagolagoina mātua (sponsor), ‘e tatau ‘ona pe tusa ma le $33.56 ‘i le itūlā lona totogi ‘ae ‘o mātua, ‘e tatau ‘ona $32,611.28 ana tupe maua, po’o le tatau lea ‘ona iai ni a lātou lava tupe ‘e $160,000 pe ‘ā fai ‘e to’atasi, (single) po’o le $250,000 pe ‘ā to’alua, po’o le couple.  Na saunoa Tupou, ‘o nei tapula’a ma tu’utu’uga, ‘e matuā lē ‘ausia lava ‘e le tele ‘o tagata Pasefika.

Link to PMN News (Article) translated: https://pmn.co.nz/read/politics-/luxon-defends-new-parent-boost-visa-amid-claims-it-excludes-pacific-families

ATA: PMN News / Ala Vailala