Pāsia ‘e le Maota ‘o Sui ‘a le Iūnaite Setete le fuafuaga ‘a le Peresetene mō le Pasefika

‘Ua pāsia ‘e le Maota ‘o Sui ‘a le Iūnaite Setete, se pili ‘e alagātatau ai ‘i peresetene ‘o ‘Amerika ‘ona ātia’e se ta’iala mō Faigāpā’aga ma le Pasefika.  ‘Āfai ‘ae pāsia lea pili ‘e ‘avea ma tūlāfono, ‘e ao ‘ona gālulue fa’atasi le Peresetene ma le Failautusi ‘o le Setete, ‘e tāpena ma tu’uina atu ‘i komiti ‘e talafeagai ai ‘a le konekeresi, se ta’iala ‘e fa’aulutalaina, “Strategy for Pacific Partnership” po’o “Ta’iala mō Faigāpā’aga ma le Pasefika”.

‘E tatau ‘ona fa’ataunu’u ‘ia muamua a’o le’i o’o ‘i le aso 1 Ianuari 2026 ma ‘ia ‘aua fo’i ne’i silia ma le aso 1 Ianuari 2030.  ‘O lo’o fa’ailoa ‘i lenei pili, ‘e fa’apea ‘o lea ta’iala ‘o le ‘ā aofia ai ni ta’iala ‘e fa’alautele ai le so’otaga mō le Iūnaite Setete ma atumotu ‘o le Pasefika, fa’atasi ai ma se fuafuaga, ‘e tali ai ‘i fa’afītāuli ‘o lo’o feagai ma le Pasefika ‘e aofia ai fa’alavelave fa’alenātura.  ‘O le ‘ā aofia ai fo’i ma se vaevaega au’ili’ili ‘o mo’omiaga ma matāti’a fia ‘ausia ‘o lo’o folasia ‘e faigāmālō ‘a atunu’u ‘o le Pasefika.

Link to RNZ (Article) translated by Savelina Kasiano: https://www.rnz.co.nz/international/pacific-news/528208/us-house-passes-bill-on-presidential-pacific-plan

ATA: President Joe Biden, fourth from left, stands with Pacific Islands Forum leaders as they pose for a group photo at the White House in Washington, Monday, Sept. 25, 2023. (AP Photo/Mark Schiefelbein)