Osofa’ia le ‘Ofisa ‘o le Fono ‘a Ta’ita’i ‘o le Pāsefika ‘i Suva

‘Ua fa’amāonia mai ‘e le Failautusi Āoāo ‘o le Fono ‘a Ta’ita’i ‘o Mālō ‘o le Pāsefika, le ali’i ‘o Baron Waqa, sa iai se osofa’iga fa’asaga ‘i masini ‘o feso’ota’iga televavave ‘i ‘ofisa ‘o le Pacific Island’s Forum ‘i le a’ai ‘o Suva ‘i Fiti.

Na ia tā’ua, ‘o lea ‘ua mafai ona faia iai se fuafuaga ‘a le ‘aufaigāluega, ‘e ui ‘ina ‘e le’i mafai ‘ona fa’amautūina po’o ai na fa’apōgai ai ‘i lenei osofa’iga fa’atekonolosi ‘o masini ‘o feso’ota’iga ‘a le Forum.

‘O le taimi nei ‘o lo’o tau fa’amautūina le lipoti fa’ai’u ‘e tusa ‘o lenei fa’alētonu ‘e fa’apea na aliali mai po’o le māsina ‘o Fepuari ‘o le tausaga nei.

Na tā’ua fo’i ‘e le ali’i Failautusi, sa iai tu’uā’iga ma māsalosāloga ‘e fa’apea ‘o le Mālō Saina sā fa’apōgai ‘i lenei matā’upu, peita’i, ‘o le ‘a fa’atō’a manino le mata ‘o le vai pe ‘a o’o ‘ina lōmia ma fa’amautūina le lipoti ‘o lo’o tāpenaina.

Peita’i, ‘o lo’o tē’ena mālosi ‘e le Matāgāluega ‘o le Vā ‘i Fafo ‘a le Mālō Saina, ia tu’uā’iga ma ō lātou fa’aālia ai, ‘o se lipoti taufa’asesē ma lē sa’o lea tūlaga.

ATA: Secretary General of the Pacific Islands Forum Baron Waqa / PIF FB