Maualuga le nūmera ‘o tupulaga Pasefika ‘e vape ‘ae alu ‘i lalo le nūmera ‘o tupulaga ‘e vape ‘i le atunu’u
‘Ua fa’aopoopoina le nūmera ‘o tupulaga ā’oga ‘i kolisi (high schools) ‘ua lē toe vape (po’o le ulaula ‘i tapa’a ‘ia ‘e fa’aaogā ai le ‘eletise. Peita’i, ‘ua fa’amauina le faigatā ‘i tamaiti Pasefika ‘ona tu’u le vape ‘aemaise lava ‘i tupulaga mātutua. ‘E iai le sā’ili’iliga na faia ‘e le Asthma and Respiratory Foundation, sa su’esu’e ai le silia ma le 11,300 ‘o tamaiti mai vasega 7 ‘e o’o atu ‘i vasega 13.
Na māua ‘i ia su’esu’ega, ‘o le aotelega ‘o le fuainūmera ‘o tamaiti ‘i Vasega 9 ‘e o’o atu ‘i Vasega 13, na matuā pa’ū lava mai le 26.6 pasene ‘i le 2021, ‘i le 12.2 pasene ‘i le tausaga ‘e 2023. 26 pasene ‘o tamaiti ā’oga ‘i vasega 13 na lipotia na vape ‘i aso ‘e fitu mulimuli, ‘o se fuainūmera ‘ua fa’aluaina mai le 12.6 pasene ‘i le lua tausaga muamua atu.
Na fa’aalia ‘e Letitia Harding, ‘o le ‘ōfisa sili ‘o le fa’alāpotopotoga mō le ma’i sela ma fa’afitāuli ‘o le mānava, ‘o tamaiti mātutua Niu Sila Europa ma Māori, ‘e fōliga mai ‘e fa’aluaina le maualuga ‘o lo lātou fa’aaogāina ‘o ia tapa’a ‘i aso ‘e fitu mulimuli ‘o le sā’ili’iliga. Peita’i, ‘o lo’o matuā maualuga lava mō tamaiti Sāmoa ‘i le 16 pasene, ‘o le vāega po’o le kulupu lea ‘e lona lua lona telē. Na fa’aalia ‘e Harding, ‘e mo’omia lava ni polokalame ‘o a’oa’oga ‘e fa’apitoa mō ia tamaiti.
‘Ae ‘i le sā’ili’iliga ‘a le Matāgāluega ‘o le Soifua Mālōlōina, le Annual Health Survey, ‘ua fa’aalia ai, ‘o tagata Pasefika mātutua, ‘ua fa’aitiitia lo lātou ulaula ‘i le aso, mai le 22.6 pasene sā iai ‘i le 2011/12, ‘i le 12.3 pasene ‘i le 2023/2024. ‘E ui ā ‘i lea, ‘ae ‘ua fa’aalia ‘e ‘i lātou na tāpenaina le Sā’ili’iliga Fa’aletausaga ‘o le Soifua Mālōlōina, ‘e fōliga mai ‘e lē ‘ausia le fa’amoemoega ‘o Niu Sila ‘ina ‘ia o’o atu i le tausaga ‘e 2025, ‘ua ‘i lalo ifo ‘o le 5 pasene ‘e fa’aitiitia ai le ulaula tapa’a ‘i le aso.
Link to RNZ (Article) translated by Savelina Kasiano: https://www.rnz.co.nz/international/pacific-news/534861/pacific-youth-grapple-with-high-vaping-rates-amid-nationwide-fall
ATA: Sāmoa Capital Radio (file).