Mālosi solitulāfono tau feso’ota’iga televavave ‘i le Pasefika ma ‘Āsia

‘Ua matuā mata’utia ‘i le taimi nei, le mālosi ma le fa’ateteleina ‘o soligātūlāfono ‘i luga ‘o feso’ota’iga televavave ‘i totonu ‘o ‘Āsia fa’apea ai ma le Pāsefika.

‘O le līpoti sā tu’uina mai ‘i le aso 17 ‘o Iuni ‘a le Fa’alāpotopotoga ‘o Leoleo Fa’alevāomālō, ‘o le Interpol, na tā’ua ai ‘e fa’apea, ‘e sili atu ‘i le ‘afa ‘o atunu’u sā aofia ‘i lā lātou su’esu’ega, na iloa ai ‘o le 30 pāsene ‘o soligātūlāfono sā tutupu mai ai, ‘o itū’āiga ‘o solitūlāfono ia ‘e tā’ua ‘o cybercrimes, ‘e a’afia ai feso’ota’iga televavave fa’atēkonolosi.

‘E tusa ‘o le ‘afa ‘o ia atunu’u na līpotia mai ai le gau ai ‘o ni sēleni ‘e o’o ‘i le $10,000 afe Tālā ‘Amerika, ‘a’o nisi fo’i ‘o ia atunu’u na’o le selau miliona tālā ‘Amerika na goto ai ‘i ia itū’āiga ‘o soligātūlāfono.

‘O le tausaga ‘e 2024, ‘e tusa ai ‘o lenei līpoti ‘a le Interpol, ‘e sili atu ‘i le 6.5-Piliona, le aofa’iga ‘o itū’āiga ‘o soligātūlāfono fa’apea sā fa’amauina ai ‘i atunu’u ‘o ‘Āsia fa’apea ma le Pasefika ‘i Saute

‘E manatu le Interpol ‘e tele fa’alāpotopotoga solitūlāfono fa’alevāomālō, ‘ua lātou fa’aaogāina le tūlaga le pāleni po’o le lē tutusa ‘o mea tau ‘i le puipuiga ‘o feso’ota’iga televavave ‘i nei vāega ‘o le lalolagi.

‘E mautinoa lava ‘o atunu’u ‘e mālolosi ‘o lātou tamāo’āiga, ‘ua iai faiga mautū ‘e puipuia ai le tūla’i mai ‘o ni soligātūlāfono fa’apenei, ‘ae ‘o le tele ‘o isi atunu’u ‘e aofia ai mālō lāiti tau ātia’e ‘o le Pasefika, ‘e tele fa’afītāuli ‘o lo’o lātou feagai ‘i le fa’atūlagaina ‘o ni puipuiga mō ia itū’āiga ‘o solitūlāfono.

‘E iai se polokalame fa’alevāomālō ‘a le Interpol na fa’a’uma ‘iā Iūlai ‘o le tausaga na te’a nei, 2025, ‘e fesoasoani ai mō atunu’u ‘o ‘Āsia ma le Pasefika, ‘e aofia ai ma Sāmoa, ‘ina ‘ia silafia ai lea itū’āiga ‘o fa’afītāuli ma tāpena ai ni puipuiga ‘ina ‘ia mafai ‘ona tāofia vave ai le saga tūla’i mai pea ‘i le lumana’i.

Sā lagolagoina mālosi lea polokalame ‘e le ‘Ōfisa ‘o le Vā ‘i Fafo ‘a le Mālō Peretānia ma le ‘Ōfisa mō Ātina’e ‘a le Fa’alāpotopotoga ‘o Mālō ‘o le Taupulega.

Link to RNZ (Article) written by Christina Persico: https://www.rnz.co.nz/news/pacific/614343/dramatic-cybercrime-increase-in-asia-south-pacific-says-interpol

IMAGE/ATA: Unsplash / RNZ