Mālosi le Fono ‘a Ta’ita’i ‘o le Pāsefika

‘Ua fa’amamafaina mai ‘e le Fono ‘a Ta’ita’i ‘o Mālō ‘o le Pāsefika, le Pacific Islands Forum le tūlaga mausalī ma le māopoopo ‘o lenei fa’alāpotopotoga, ‘e ui ‘ina tele le mau lu’itau ‘o feagai nei ma le Pāsefika, ‘aemaise o suiga ‘o le tau, lea ‘o lo’o lauāluga ‘i matā’upu pātino ‘i atumōtu ‘o le pāsefika.

‘O le fonotaga fa’apitoa ‘a ta’ita’i lea sā ‘i le motu ‘o Vava’u, sa māfuli talanoaga ‘a ta’ita’i ‘i matā’upu ‘e aofia ai le puipuiga ‘o le saogālemū, ma le tausiga ‘o le tūlafono ‘ae fa’apea suiga ‘o le tau ‘atoa ma vevesi ‘i loto’ifale ‘o atumōtū ‘o Niu Kaletōnia.

Na mālilie ai ta’ita’i ‘o le pāsefika, ‘ina ‘ia alu se ‘aumalaga fa’apitoa ‘i Niu Kaletōnia, ‘e pei ‘ona fa’atalosagaina mai ‘e le lātou faigāmālō ma ‘ua iai ma le ioega ‘a le mālō ‘o Falani.

‘Ua talia fo’i ‘e ta’ita’i ‘o le Forum le lagolagosua ‘a le Mālō ‘Ausetālia ‘i se polokalame ‘o le ‘a fa’atūina ai se ā’oga fa’aleoleo ‘i le ‘a’ai ‘o Brisbane ‘e ‘avea ma nofoāga tūtotonu ‘e fa’avaeina ai se “Vāega ‘o Leoleo Fesoasoani ‘a le Pāsefika” ‘e mafai ‘ona ‘auina atu mo gāluega fa’apitoa ‘i le tausiga ‘o le tūlafono ma le fīlemū ‘i soio se atunu’u ‘o le pāsefika ‘i le lumana’i.

‘O ia matā’upu ‘uma, ‘ua aofia ‘i le tu’ufa’atasiga ‘o i’ugāfono ‘a le Forum lona 53  ‘e pei ‘ona fa’ai’uina ai ‘i Tonga ‘i le fa’ai’uga ‘o le vaiasao talu ai.

ATA: The Pacific Islands Forum Leaders at their retreat in Vava’u in the Kingdom of Tonga / PLF FB.