Lē fiafia Anae ‘i le Greens ma la lātou talosaga lautele ‘ina ‘ia lēai se visa ‘e malaga mai ai tagata Pasefika ‘i Niu Sila

‘Ua lē fiafia le afioga Anae Arthur Anae, ‘i se fuafuaga ‘a le Pātī ‘a le Greens, ‘e faia sa lātou Talosaga Lautele, po’o se Petition, ‘e lē toe faia ai ni visa mō tagata Pasefika ‘e fia malaga asiasi mai ‘i Niu Sila ‘i le lumana’i.

‘O le Aso To’ona’i, lea na ‘āmata āloa’ia ai taumafaiga ‘a le Pātī ‘a le Greens, mō le fa’amāopoopoina ‘o se talosaga lautele, ‘e tusa ai ‘o lenei matā’upu.  ‘O le manatu ‘o le pātī ‘a le Greens, ‘o aiaiga ‘o le visa ulufale lea ‘e taofia ai tagata Pasefika mai le malaga mai ‘i totonu ‘o Niu Sila, ‘e lē fetaui ma le talafeagai. 

‘O lo’o fa’apogai ‘i le talosaga lenei ‘a le Greens, ‘ia le ali’i faipule ‘o Teanau Tuiono.  Sā ia fa’ailoa mai ‘e fa’apea sā ia taumafai fo’i ‘e tu’uina atu se talosaga fa’apea ‘i le Palemene ‘i le taimi ‘o le faigāmālō  talu ai nei ‘a le Labour, ‘ae ‘e le’i manuia.  Peita’i lā, ‘o lenei gaioiga ‘a le Greens, ‘e lē’o fiafia ‘i ai le afioga Anae, lē sā ‘avea muamua ma faipule ‘o le pātī ‘a le National. 

Na tā’ua ‘e Anae, ‘o lo’o silafia lelei ‘e le Greens, ‘o lo’o galue mālosi ‘o ia ‘i lenei lava matā’upu, ma ‘o lona tāofi ‘e lē fetaui le toe faia ‘o se isi talosaga, ‘e fōliga ai ‘ua kopi ma fa’ata’ita’i le pātī ‘a le Greens ‘i se taumafaiga, ‘o lo’o galue ai ‘o ia ‘i le taimi nei.

‘O le māsina na te’a nei, lea na fa’aulu ai ‘e Anae se talosaga lautele ‘e tusa ‘o le matā’upu lenei ‘i visa ulufale mō tagata atumotu, ‘ae pei ‘ona silafia, ‘ua tele tausaga ‘o galue ‘o ia ‘i le taumafaiga ‘o le sitiseni ‘o tagata Sāmoa.

Link to RNZ (Article) translated: https://www.rnz.co.nz/news/political/544214/ex-national-mp-bashes-green-s-visa-free-pacific-travel-petition-despite-endorsing-cause

ATA: RNZ / Cole Eastham-Farrelly