‘Ioe le Mālō Tonga ‘e talimālō ‘i ta’aloga ‘a le Pāsefika ‘i le tausaga ‘e 2031

‘Ua ‘ioe le Mālō Tonga, ‘o le ‘ā talimālō ‘i lātou ‘i tā’aloga ‘a le Pasefika ‘i le tausaga ‘e 2031, ‘o lea la’asaga ‘ua faia ‘ina ‘ua tuana’i le fitu ‘o tausaga talu ‘ona fa’ama’amulu Tonga mai le faia ai ‘o Tā’aloga ‘a le Pasefika ‘i le 2019.

‘O le fa’ai’uga ‘e talimālō Tonga ‘i tā’aloga ‘o le 2031, na faia ‘i le nu’u ‘o Koror ‘i Palau, ‘i se fonotaga ‘a le Komiti Fa’afoe ‘o Tā’aloga ‘a le Pasefika sā usuia ai.

Na lagolagoina ‘e sui ‘āuai ‘e to’a 12 ‘o le Komiti Fa’afoe, le mana’o ‘o Tonga, ‘ae to’aiva sui na pālota ‘e lagolago le talosaga ‘a Fiti.

‘O se taimi muamua lenei ‘o le ‘ā faia ai ‘i Tonga tā’aloga nei ‘a le Pasefika, talu mai le tausaga ‘e 1989 lea sā talimālō ai ‘i lātou ‘i tā’aloga lāiti po’o le Pacific Mini Games.

‘Ae pei ‘ona silafia, ‘o le fa’ama’amulu ‘o Tonga mai le faia ai ‘o tā’aloga ‘i le 2019, na māfua ai ‘ona se’e atu tā’aloga nei ‘a le Pasefika ma talimālō ai Sāmoa ‘i lea tausaga.

Na ‘avea lea tūlaga ma mea na fa’ate’a ai Tonga mai le Komiti Fa’afoe ‘o Ta’aloga ‘a le Pasefika, ‘ae peita’i ‘ua lua nei tausaga talu ‘ona toe talia Tonga ‘e ‘auala ‘i se fa’ai’uga mai le fa’amasinoga, ma ‘ua toe maua ai nei lo lātou avanoa ‘e talimālō ai ‘i isi tā’aloga ‘a atunu’u ‘o le Pasefika ‘i Saute ‘i le 2031.

Link to RNZ (Article) translated by Lauano Ati Ilaoa: https://www.rnz.co.nz/news/pacific/529866/tonga-to-host-2031-pacific-games

ATA: Team Tonga at the opening ceremony for the 17th Pacific Games in Solomon Islands. 19 November 2023. RNZ Pacific / Junior Maealasia