Fa’avaeina le fa’alāpotopotoga ‘e tali atu ‘i mana’oga tau ‘i le puipuiga ‘o le Pāsefika (Pacific Response Group)

‘O le fa’avaeina ‘o se Fa’alāpotopotoga ‘a le Pasefika, ‘e tali atu ‘i ni mana’oga fa’apitoa tau ‘i le puipuiga, ‘o se tasi lea ‘o matā’upu ‘autū na pāsia ‘i lona iva ‘o fonotaga fa’aletausaga ‘a le vasega ‘o Minisitā ‘o le Puipuiga ‘a atunu’u ‘o le Pasefika ‘i Saute lea sā faia ‘i ‘Aukilani ‘i le vāiaso ‘ua mavae.

‘E tolu aso ‘o lea fonotaga sā talimālō ai Niu Sila, ma sā ‘āuai sui ‘āuai mai atunu’u ‘e iai Chile ‘i ‘Amerika ‘i Saute, fa’apea Falani, ‘o ‘Ausetālia, Fiti, Pāpua Niu Kini ma le minisitā ‘o le puipuiga ‘a le mālō ‘o Tonga, ‘o sui ‘āuai ia ‘o lea mafutaga.

‘E lē gata ‘i lea sā ‘āuai fo’i ‘i le tūlaga ‘o sui fa’alogologo ‘ia le mālō ‘o Iāpani, Peretānia fa’apea ma le Iūnaite Setete ‘o ‘Amerika.

Na ‘ioeina ai ‘i lenei fonotaga, le tatau lea ‘ona fa’amālosia ‘o le gālulue fa’atasi ‘o sui ‘āuai ‘e tali atu ‘i fa’alavelave fa’alenātura ‘e māfua mai suiga ogaoga ‘o le tau, ma ‘ia saga fa’aleleia gāluega fesoasoani mō tagata ‘e a’afia ai.  ‘Ae lē gata ‘i lea, sā ‘ioeina fo’i ‘i lea fonotaga le tatau ‘ona mata’itūina lelei ‘o uiga solitulāfono ‘o lo’o faia pea ‘i ‘ōgāsami ‘o le Pasefika ‘i le fāgotaina fa’ananā ‘o i’a ma isi ālāmanuia, ‘aemaise ‘o le fe’avea’ia lea ‘o vailā’au fa’asāina ‘i le vā ‘o mālō.

Na fa’ailoa mai ‘e le Minisitā ‘o le Puipuiga ‘a Niu Sila, ‘iā Judith Collins, ‘e 17 le aofa’iga ‘o ni fuafuaga fa’ata’atitia ‘ua pāsia ma ‘ioeina ‘i lenei fonotaga, mā ‘o le ‘ā ‘āuai ma a’afia uma ai vaegā’au ‘a sui ‘āuai se’ia vaganā ai le mālō Chile, ‘i le fa’atinoga ‘o nei polokalame ‘uma.

Link to RNZ (Article) translated by Lauano Ati Ilaoa: https://www.rnz.co.nz/international/pacific-news/529793/pacific-defence-ministers-approve-creation-of-disaster-response-group-for-region

ATA: Pacific defence ministers in Auckland. 3 Ocotber 2024. Facebook / Richard Marles MP