Fa’ata’ita’i meatau fa’atonutonu alu mamao ‘a le Mālō Saina ‘i le vasa Pāsefika

‘O le vaiaso na te’a nei na fa’ata’ita’i ai se meatau fa’atonutonu alu mamao ‘a le Mālō Saina ‘i le vasa pāsefika, ma palasi ai ‘i le sami pē tusa ma le 700 kilomita le mamao mai atumotu ‘o Makesa ‘i Falani Polenesia, po’o French Polynesia,  po’o Tahiti ‘e pei ‘ona lausilafia ai.

‘O lenei fa’ata’ita’iga ‘a le Mālō Saina, na fanaina mai ai lenei meatau alu mamao mai lau’ele’ele ‘o Saina ‘ae pa’u ‘i le vasa pāsefika, ‘i tua atu ‘o le sone ‘o le tamāo’aiga ‘o atumotu ‘o Tahiti, ia ‘e pūlea ‘e le Mālō Falani.

‘O se lipoti ‘a le leitiō Niu Sila, na tā’ua ai ‘e le Mālō Saina, ‘e fa’apea, a’o le’i faia le latou fa’ata’ita’iga, sa muamua ‘ona o latou fa’ailoaina mai lea fuafuaga, ‘i mālō ‘o le pāsefika, ‘aemaise ai ‘o mālō tetele ‘e pei ‘o Falani, ‘Ausetālia, Niu Sila ma le Iunaite Setete ‘o ‘Amerika.

‘O se taimi muamua lenei ‘i totonu ‘o le 40 tausaga ‘ua tuana’i, ‘ua faia ai se fa’ata’ita’iga ‘o se meatau fa’atonutonu alu mamao ‘a le Mālō Saina ‘i totonu ‘o le vasa pāsefika.

A’o le’i faia lea faata’ita’iga, ‘ae ‘ua ‘uma ‘ona fa’ailoa mai atugaluga ‘o Mālō ‘e iai ‘Ausetālia, ‘Iāpani, fa’apea Niu Sila mā isi atumotu ‘o le pāsefika, ‘i le tūlaga lamatia ‘o le nofo lelei mā le nofo filemu ‘o atunu’u ‘o le pāsefika.

Link to RNZ (Article) translated by Lauano Ati Ilaoa: https://www.rnz.co.nz/international/pacific-news/529200/china-s-missile-test-triggers-diplomatic-shockwaves-in-french-polynesia

ATA: An image released by the Chinese People’s Liberation Army showing the launch on Wednesday of an ICBM carrying a dummy warhead. Chinese People’s Liberation Army / AFP – Getty Images (Sourced from NBC News).