Fa’amata ‘o sāuni Niu Sila ‘e talia tagata mai le Pasefika ‘ona ‘o a’afiaga mai suiga ‘o le tau?

‘O le taimi nei, ‘a fia malaga tagata Pasefika ‘e aumau ‘i Niu Sila ‘ona ‘o a’afiaga ‘o atunu’u mai suiga ‘o le tau, ‘e tatau ‘ona totogi le $1385 Niu Sila ‘e talosagaina ai se visa, ma ia pasi fo’i le su’esu’ega ‘o le soifua mālōlōina, ‘ia i lalo ‘o le 45 tausaga le matua ma ‘ia iai se ‘ofa ‘o le gāluega.  ‘Ae tatau fo’i ‘ona laki muamua ‘i le se’i. 

‘O le fa’amatalaga ‘a se faufautua ‘a le World Vision, Dr Olivia Yates, ‘o aiāiga ‘a Niu Sila ‘o lo’o iai ‘i le taimi nei mo tagata ‘e fia malaga mai fafo ma aumau ‘i le atunu’u, ‘e lē talafeagai mō ē ‘e ala ‘ona tu’ua o lātou atunu’u, ‘ona ‘o a’afiaga mai suiga ‘o le tau, po’o le climate mobility.  ‘O avanoa mō visa nofo mau mō le Pasefika, ‘e aofia ai le 500 ‘o tagata mai Fiti, 150 mai Kiripati, 500 mai Tonga ma le 250 mai Tuvalu ‘i tausaga ta’itasi.  ‘E tatau fo’i ‘i tagata talosaga ‘ona iloa faitau, tusitusi ma tautatala ‘i le Fa’aperetānia.  ‘O lo’o valo’ia le o’o atu ‘i le 50,000 tagata Pasefika ‘e lē toe iai ni fale ‘i tausaga ta’itasi ‘ona ‘o le suiga ‘o le tau. ‘O le sefulu tausaga talu ai, ‘e to’atasi mai le to’asefulu tagata mai Kiripati, Nauru ma Tūvalu ‘ua malaga ‘ese ‘ona ‘ua fa’ateteleina a’afiaga ‘o o lātou atunu’u mai le suiga ‘o le tau. 

‘E talitonu Yates, ‘e mo’omia ‘e Niu Sila se faiga āloa’ia mō visa ‘auā tagata ‘e a’afia ‘ona ‘o suiga ‘o le tau, ‘e pei ‘o tagata ‘e iai mana’oga fa’apitoa, tinā ma tamaiti.  Pe tusa ‘o le 50 pasene ‘o tagata ‘i le Pasefika, ‘o tamaiti ma tupulaga talavou. 

Link to RNZ (Article) translated by Savelina Kasiano: https://www.rnz.co.nz/news/pacific/526936/is-new-zealand-s-immigration-set-up-to-take-in-climate-migrants-from-the-pacific

ATA: UN Photo / Eskinder Debebe / RNZ.