Fa’aleo popōlega ‘o le Pasefika ‘i fuafuaga ‘a ‘Amerika ‘e ‘eli ai gātaifale ‘o ‘Amerika Sāmoa

‘Ua faitioina ‘e ta’ita’i ‘o le Pasefika fa’apea ma fa’alāpotopotoga ‘e fīnauina le puipuiga ‘o le si’osi’omaga, se fuafuaga ‘a le mālō ‘o le Iūnaite Setete ‘e ūna’ia vave ai le fa’agasolo loa, ‘o le fa’atauina atu ‘o se lisi mō le ‘eliga ‘o minerale ‘i gātaifale, ‘o ‘ōgāsami ‘a le mālō tele ‘e lata ane ‘i ‘Amerika Sāmoa.

‘E ui ‘e tusa ma le 70,000 finagalo na fa’aalia ma tu’uina atu ‘e tete’e ai ‘i lea fuafuaga, peita’i, na o lātou tā’ua, ‘ua lē amana’ia ai le tete’e ‘o le to’atele ‘o tagata ma ‘ua fa’amata’uina ai fo’i tū ma aga ‘a lenei itūlagi, ‘i lo lātou soifuaga fa’aleaso fa’apea ma le si’osi’omaga ‘o meaola ‘o le sami.

‘I lalo ‘o le fa’agāsologa ‘o le fautuaga lea ‘ua tu’uina atu ‘e le Iūnaite Setete, ‘ua fa’aalia ai, ‘e 60 aso ‘ua tu’uina atu ‘i le Kōvana ‘o ‘Amerika Sāmoa Pulaali’i Nikolao Pula ‘e toe iloilo ma fa’aalia ai sona finagalo ‘a’o le’i ono tu’uina atu ‘e le Pūlega lea ‘e ta’ua ‘o le Bureau of Ocean Energy Management, se fa’aaliga mulimuli mō le lisi. 

Na saunoa Dr Sabrina Suluai-Mahuka ‘o le Finafinau ‘i ‘Amerika Sāmoa, ‘e lē na’o le ‘eliga ‘o minerale ‘o lo’o aofia ‘i lalo ‘o lea fuafuaga.  ‘E mafai ‘ona lātou fuafua le fa’atauina atu ‘o se lisi ‘e fa’aaogā ai le gātaifale, ‘ae ‘e lē mafai ‘ona lātou lisiina pē ‘ave’esea lo lātou fa’asinomaga.  ‘Ua tutū fa’atasi tagata ‘o le atu Mariana ‘e lagolago ‘iā ‘Amerika Sāmoa.  Na fa’aalia ‘e le BOEM ‘e fa’apea, ‘o le tu’u atu ‘o le Proposed Leasing Notice (Fa’asilasilaga Fa’ata’atia mō le Fa’atauina ‘o Laisene) ‘e lē fa’apea ‘ua mautinoa ‘o le ‘ā fa’atauina ai se laisene, pē ‘o le ‘ā i’u lava ‘ina faia ni su’esu’ega po’o ni gāluega ‘e aoina pe ‘eliina ai minerale.

Link to RNZ Pacific (Article): https://www.rnz.co.nz/news/pacific/749226/pacific-voices-condemn-us-plan-for-offshore-mineral-extraction-off-american-samoa

IMAGE/ATA: Office of the Governor – American Samoa Facebook