‘Auai le kōvana sili ‘o NZ ‘i sauniga fa’amanatu mō le ‘ātoaga ‘o le 50 tausaga ‘o le mālō ‘o Niuē

‘O lo’o iai nei ‘i le motu ‘o Niuē, le tama’ita’i Kōvana Sili ‘o Dame Cindy Kiro ma lona ali’i, Dr Richard Davies, ‘e fai ma sui ‘o le mālō ma tagata ‘o Aotearoa, ‘i sauniga ‘e fa’amanatu ai le ‘ātoaga ‘o le 50 tausaga talu ‘ona pūlea ‘e Niuē lo lātou lava mālō ma le atunu’u, ‘i se fetu’una’iga fa’apitoa ma le Mālō ‘o Niu Sila.

‘Ua pūlea ‘e le mālō Niuē lo lātou lava atunu’u ‘i tūlaga ‘uma, ‘ae ‘e i lalo ‘o le fa’amalumaluga ‘a le Mālō ‘o Niu Sila, ‘e pei ‘o le Atu Kuki fa’apea ai ma motu ‘o Tokelau.‘O le tausaga ‘e 1974 lea na ‘āmata mai ai ‘ona pūlea ‘e le mālō Niuē lo lātou lava atunu’u. Na fa’ailoa mai ‘e fa’apea ‘o se taimi muamua lenei ‘ua o’o ai ‘i Niuē le tama’ita’i kōvana sili ‘o Niu Sila.

‘E lē gata ‘ina saunoa ai ‘o ia ‘i totonu ‘o le Palemene ‘o Niuē, ‘ae ‘o le ‘ā maua ai le avanoa ‘e feiloa’i ai ma nisi ‘o ta’ita’i ‘o lea atumotu, ‘aemaise ‘o  ta’ita’i mai isi mālō ‘o le Pasefika, ‘o lo’o ‘āuai ‘i sauniga nei mō le Fa’avae ‘o le Mālō ‘o Niuē, le Pule Fakamotu po’o le Constitution Day.

Link to RNZ (Article) translated by Lauano Ilaoa: https://www.rnz.co.nz/international/pacific-news/531076/nz-governor-general-heading-to-niue-for-celebrations

ATA: RNZ / Samuel Rillstone