Āsiasiga ‘a Ta’ita’i ‘o le Pasefika ‘i Niu Kaletōnia

‘Ua fa’amaonia mai ‘e le Peresetene ‘o le faigāmālō ‘a Niu Kaletōnia, ‘o Louis Mapou, ‘o le vaiaso ‘ā sau, lea ‘o le ‘ā taunuu atu ai ‘ia le ‘aumalaga aloa’ia mai le Fono ‘a Ta’ita’i ‘o Mālō ‘o le Pasefika, po’o le Forum, ‘e pei ona fuafuaina ai. Na fa’aalia ‘e le ali’i peresetene, ‘o aso ‘ua fa’atūlagaina ‘e iai ‘i Niu Kaletōnia lenei ‘aumalaga, ‘o le aso 27 ‘e o’o ‘i le aso 29 ‘o ‘Oketopa.

‘O le aso 20 ‘i le 24 ‘o ‘Aukuso na mua’i fuafuaina ai lea faigāmalaga, ‘a’o lumana’i ai le fonotaga ‘a le Forum ‘i Nukualofa ‘i Toga, peita’i na toe tolopō ona ‘o ni ‘ese’esega ‘i le vā o le Mālō o Falani ma le faigāmālō fa’alotoifale ‘a Niu Kaletōnia.‘O vevesi ma fa’alavelave tutupu ‘i Niu Kaletōnia, sa mamafa ‘iai talanoaga ‘i le fono ‘a le Forum ‘i Nuku’alofa ma sā ‘āuai ‘e lē gata ‘o sui ‘o le Mālō o Falani ‘ae fa’apea ai ma sui ‘o le faigāmālō fa’alotoifale ‘a Niu Kaletōnia.

‘O le agaga ‘o le asiasiga ‘a le ‘aumalaga lenei mai le Forum, ina ‘ia maua ai se līpoti ‘ato’atoa ‘e tusa ‘o fa’alavelave ia na aliali mai ‘āmata ‘i le aso 13 ‘o Mē ‘i totonu ‘o Niu Kaletōnia.‘O sui ‘o le ‘aumalaga ‘e aofia ai pālemia ‘o Fiti, Toga, le Ātu Kuki fa’apea ma le Ātu Solomona.

Link to RNZ (Article) translated by Lauano Ati Ilaoa: https://www.rnz.co.nz/international/pacific-news/531402/pacific-islands-forum-fact-finding-mission-dates-confirmed-new-caledonia-president

ATA: RNZ Pacific / Lydia Lewis – The PIF mission was initially to take place from 20-24 August, ahead of the Pacific Islands Forum Leaders’ Meeting in Tonga.