‘Āmata le polokalame ‘e ūna’ia ai tinā Pasefika ‘e faia a lātou siaki

‘Ua ‘āmatalia nei se polokalame fou, ‘e ‘autū ‘i le ūna’ia lea ‘o tinā ma tama’ita’i Pasefika ‘i totonu ‘o Niu Sila, ‘ina ‘ia faia a lātou Siaki ma su’esu’ega mō le kānesa ‘o susu.

‘Ua fa’aigoaina lea polokalame fa’alaua’itele, ‘o le ‘Vaine Toa’, ma na fa’ailoa mai ‘e le Fa’atonu ‘o le Breastscreen Aotearoa, ‘o Lisa Te Paihop,  ‘e tele māfua’aga ‘e ala ai ‘ona to’atele Pasefika ‘e lē ‘o maua lenei fesoasoani, ‘i le faiga ‘o Siaki mō lenei gasegase.

‘O nisi ‘o fa’afītāuli ‘e aofia ai le lēai ‘o ni ta’avale ‘e malaga ai ‘i nofoaga ‘e faia ai ia sā’ili’iliga, ‘ātoa fo’i ma fa’afītāuli tau tupe ma isi tūlaga fa’apēnā.

Na tā’ua ‘e le tama’ita’i fa’atonu, ‘o lo’o iai le fa’amoemoe ‘ina ‘ua maua le aofa’iga ‘e 70 pasene ‘o tinā ma tama’ita’i Pasefika ‘e su’esu’eina ‘i lenei polokalame ‘ua fa’agāsolo ‘i le taimi nei.

‘O le ma’i ‘o le breast cancer, ‘o le kānesa aupito ‘i ta’atele lea ‘e a’afia ai tinā ma tama’ita’i ‘i totonu ‘o Niu Sila, ‘ei le vā ‘o le 300 ma le 400 le aofa’iga ‘o i lātou ‘e āfāina ai ‘i tausaga ta’itasi.

Sā fa’amamafaina mai ‘e lēai se mea ‘e ono matamuli ai tinā ma tama’ita’i ‘e talanoa ‘i lenei gasegase ‘aemaise ‘o le āga’i ane ‘e faia siaki ‘e pei ‘ona fa’agāsolo ai le polokalame ‘i itū ‘ese’ese ‘o le atunu’u.

Link to RNZ Pacific (Article) translated: https://www.rnz.co.nz/international/pacific-news/564229/new-campaign-aims-to-encourage-more-pasifika-women-to-get-breast-screening

ATA: RNZ / SCR (file).