35 tausaga ‘o le tautua ‘a le Leitiō Niu Sila (RNZ) ‘i le Pasefika

by | Jan 27, 2025 | Pacific

‘O le fa’ai’uga ‘o le vaiaso na fa’ailogaina ai le 35 tausaga talu ‘ona ‘amata le tautua ‘a le Leitiō Fa’asalalau ‘a Niu Sila mō atumotu ‘o le Pasefika.

‘O le ‘au’aunaga lenei ‘a le Radio New Zealand Internatioal, po’o le RNZI ‘i le fa’apu’upu’u, na ‘amatalia ‘i le aso 24 ‘o Ianuari ‘i le tausaga ‘e 1990, ‘o le aso tonu lea na tatala ai aloā’ia ta’aloga ‘a mālō ‘o le Taupulega, po’o le Commonwealth Games ‘i le ‘a’ai ‘o ‘Aukilani.

‘O le masini fa’asalalau po’o le transmitter ‘e 100 kilomita le mālosi, sā fa’aaogā ‘e fa’asalalauina atu ai polokalame ‘aemaise ‘o talafou ‘a le RNZ āga’i atu ‘i atumotu ‘o le Pasefika.

Sā toe fa’aigoaina lenei ‘au’aunaga ‘o le RNZ Pacific ‘i le tausaga ‘e 2017, ‘ae le’i suia ai lona fa’amoemoe ‘autū, ‘ina ‘ia tāpenaina talafou aupito ‘i sili ‘ona lelei ma ‘ia ‘avea ‘o se ūaealesi fa’asalalau fa’atuatuaina ‘e le ‘au fa’asalalau ‘i totonu ‘o le Pasefika.

‘Ae pei ‘ona silafia, ‘ole tausaga ‘e 1948 na mua’i ‘amata ai fa’asalalauga ‘a le Uaealesi Fa’asalalau lenei ‘a Niu Sila āga’i ‘i atumotu ‘o le Pasefkia, se’ia taunu’u mai ‘i le tausaga ‘e 1980 lea, na manatu ai le mālō Niu Sila, ‘e tatau ‘ona saga fa’aleleia ma si’itia le mālosi ‘o nei fa’asalalauga ‘ona ‘o le tāua ma le aogā mō le Pasefika ma ona tagata, lea na māfua ai ‘ona fa’avaeina le ‘au’aunaga lenei ‘a le RNZ International, ‘e pei ‘ona iai nei.

‘O le taimi nei, ‘e tusa ma le 20 le aofa’i ‘o uaealesi faasalalau ‘i atunu’u ‘o le Pasefika, ‘o lo’o latou toe fa’asalalau ia polokalame ma le ‘au’aunaga lenei ‘a le RNZ, ma ‘ua gālulue ai ‘i lenei ‘au’aunaga mai Niu Sila nei, nisi ‘o alo ‘o Sāmoa ma le Pasefika.

Link to RNZ (Article) translated by Lauano Ati Ilaoa: https://www.rnz.co.nz/international/pacific-news/539866/rnz-pacific-35-years-of-broadcasting-to-the-region

ATA: RNZ. (Re-designed by SCR)
CAPTION: An aerial shot of the new RNZ Pacific transmitter; (L-R) Linden Clark and Ian Johnstone, former managers of RNZ International now known as RNZ Pacific, Moera Tuilaepa-Taylor, current manager of RNZ Pacific.