Āgiagia le tagāvai ‘o le Mālō Sāmoa ‘i le ‘Olimipeka 2024

‘O le taeao ‘o le Aso To’ona’i 27 ‘o Iulai (taimi Niu Sila) na tatalaina āloā’ia ai ta’aloga ‘o le ‘Olimipeka 2024, ‘o lo’o talimālō ai le mālō ‘o Farani.

‘O lea sauniga na va’aia ai le fa’afeiloa’iina lea ‘o atunu’u ‘e 184 ‘o le lalolagi, ma ā latou ‘au mo ta’aloga ‘ese’ese. Na fa’apea fo’i le ‘au ‘a le Mālō Sāmoa, na ‘ave fu’a ai le susuga ‘iā Don Opeloge, ‘e fai ma sui ‘o le tatou ‘au.

 ‘O se sauniga ‘ese lenei sauniga mai le tele ‘o fa’amoemoe ‘e tatalaina ai ‘Olimipeka, ‘e tatala ‘i totonu ‘o faleta’alo tetele ‘a le lalolagi, ‘ae ‘o lenei tausaga na gāsolo mai ai ‘au ma tagāvai ‘o latou mālō ‘i luga ‘o va’a ‘i le vaitafe ‘o le Seine ‘i Pale Farani.

‘E ui na ‘amata fa’agāsolo mai isi ta’aloga ‘o le ‘Olimipeka ‘i le taeao ‘o le Aso Tofi, ‘e pei ‘ona ‘iai le ta’amilosaga ta’ito’afitu, ‘o lea ‘o lo’o tausiniō ai le Manu Sāmoa, ‘ae ‘o le tele ‘o ta’aloga ‘o le ‘a ‘amatalia mai le taeao ‘o le Aso Sā 28 ‘o Iulai ‘i le mae’a ai ‘o lenei sauniga.

ATA: Team Sāmoa at Paris Olympics Opening 2024, Seine (AP: Lindsey Wasson)