Fuafua le Mālō ‘e fa’atau atu laisene ‘e fa’agāioi ai tā’aloga fai tupe ‘i luga ‘o ‘upegatafā’ilagi

 ‘Ua iai se fuafuaga ‘a le faigāmālō, ‘e fa’atau atu ai laisene ‘e fa’agaioi ai kasino po’o tā’aloga faitupe ‘e faia ‘i luga ‘o le ‘initaneti, peita’i, ‘o lo’o tu’uina atu fa’afautuaga ni tūlāfono ‘e fa’aitīitia ai a’afiaga ‘e māfua mai tā’aloga faitupe, ‘ae fa’aopoopo pe si’itia ai fo’i tupe maua mai lāfoga.

Na fa’a’auivi ‘e le Minisitā mō Matā’upu ‘o le Lōtoifale Brooke van Velden le polokalame ‘e faia ai talosaga ‘i tā’aloga po’o kasino ‘i luga ‘o le ‘initaneti, ‘e aofia ai le faia ‘o tapula’a ‘o le aofa’iga ‘o laisene ‘e mafai ‘ona maua mo le ta’i tolu tausaga, ma ‘e tatau ‘iā ‘i lātou ‘e fa’agaioiina ia tā’aloga (operators), ‘ona fa’amalieina tu’utu’uga ‘o le ‘ā fa’ata’atia atu, ‘a’o le’i ofoina atu ia ‘au’aunaga. ‘O le taimi nei, ‘e fa’asāina ‘i Niu Sila kasino po’o tā’aloga faitupe ‘i luga ‘o le ‘upegatafā’ilagi peita’i, ‘o lo’o fa’agaioi ‘e le SkyCity Entertainment se kasino ‘i luga ‘o ‘upegatafā’ilagi ‘i Malta, ma ‘ua leva fo’i ona vala’au ‘ina ‘ia taliaina fa’aletūlāfono ia pisinisi. Na saunoa le tama’ita’i Minisitā, ‘e le’o iai se fa’anaunauga ‘ina ‘ia si’itia ai le tā’a’alo ‘o tagata Niu Sila ‘i tā’aloga faitupe, peita’i, ‘e fa’amautinoa ai, le fa’amalieina ‘e pisinisi lātou te fa’agaioiina ia tā’aloga, tu’utu’uga mō le puipuiga ‘o tagata tā’a’alo ma fa’aitīitia ai fo’i a’afiaga ‘e o’o ‘i ai, ma ‘ia totogi ai fo’i lāfoga. ‘E tatau ‘ona lē i lalo ifo ‘o le 18 tausaga le matua ‘o le tagata ta’alo.

Link to RNZ (Article) translated by Savelina Kasiano: https://www.rnz.co.nz/news/business/523613/government-to-auction-off-licences-for-online-casinos

ATA: RNZ / 123rf.