Tōfia ‘e le Kapeneta Tamaletā Taimang Jensen ‘e ‘avea ma fa’auluuluga fou ‘a le Faletupe ‘o Ātīna’e ‘a Sāmoa

‘O se tasi lenei ‘o fa’ai’uga ‘a le Kapeneta ‘i lenei vaiaso, ‘i le suia ai ‘o fa’auluuluga ‘o matāgaluega ‘a le mālō mo leisi 3 tausaga, ma ‘ua tōfia ai ‘e le Kapeneta ‘ia Tamaletā Taimang Jensen ‘o le Pule Sili fou ‘a le Faletupe ‘o Ātīna’e ‘a le atunu’u.

‘O se tamāli’i ‘ua iai lona tomai fa’apitoa ‘i le tiute ‘ua tu’uina atu ‘iai ma ‘ua loa fo’i tausaga ‘o tautua mo Sāmoa ‘i le tele ‘o galuega, ‘e aofia ai ma le tofiga ta’ita’i fono ‘i le Komiti Fa’atonu ‘a le Faletupe ‘o Ātīna’e ‘a Sāmoa ma sa ‘avea fo’i Tamaletā ma ta’ita’i fono ‘o le polōketi ‘o Fono Fa’avae ‘a le atunu’u.

‘O lo’o ia ‘ūmia nisi ‘o fa’ailoga taualoa ‘e aofia ai le Tikerī ‘o matā’upu tau pisinisi ma le Tipiloma maualuga ‘o matā’upu tau pisinisi mai le Iunivesitē ‘o Massey ‘i Niu Sila. ‘O Tamaletā ‘ua suia ai nei le Afioga ‘iā Muā’autau Raiē Silipa sa sē’ei ‘i lea tōfiga.

IMAGE/ATA: Government of Sāmoa