‘E le’i tāpā ‘e le Matāgaluega ‘o Leoleo se fautuaga mai le Lōia Sili ‘i le fa’alauiloaina ‘o ata ma fa’amatalaga ‘o ‘i lātou ‘e mōlia ‘i fuālā’au fa’asāina

‘Ua savali atu ‘i le 12 māsina le fa’alauiloa ‘a le Matāgaluega ‘a Leoleo ‘i le tete’e atu ai lea ‘i fuālā’au fa’asāina ‘o le ‘aisa, ‘i le tau tineia lea ‘o le a’afiaga ‘ua iai tupulaga talavou ‘i le atunu’u, ‘aemaise ‘o pisinisi ‘i tupe palapalā ‘o lo’o fa’aaogāina, ‘ua alia’e mai ai ma le tele ‘o soligātūlāfono. ‘O le māfua’aga lea ‘ua fa’alauiloa fa’alaua’itele ai ‘e le ta’ita’i ‘o le atunu’u, ‘o ia fo’i ‘o le Minisitā ‘o le Matāgaluega ‘a Leoleo, ‘o ‘i lātou ‘uma lava ‘e taofia ma fa’amaonia mai ‘i osofa’iga ‘a malu ‘a le mālō ‘i fuālā’au fa’asāina, ‘o le ‘a fa’alauiloa o lātou ata, āfio’aga ma fa’amatalaga ‘e fa’atatau ‘ia ‘i lātou, ‘ia nofouta ‘iai le atunu’u ‘i le puipuiga ‘o lo lātou saogalēmū.

Talu ai ‘o le tele ‘o fa’aseā ‘a nisi ‘o ‘i lātou sa fa’alauiloa ‘ae le’i fa’amaonia ma sa soloia tu’ua’iga na fa’asaga ‘ia ‘i lātou, na fesiligia ai ‘e tusitala le Afioga ‘i le Lōia Sili ‘i sona silafia ‘i le tūlāfono, ‘i lea gaioiga ‘a le matāgaluega. Na ta’utino le Afioga ‘i le Lōia Sili ‘e o’o mai ‘i le asō, ‘e le’i va’ai lava ‘i se ata, ‘e le’i logoina fo’i ‘o ia ‘e le Matāgaluega ‘a Leoleo. Peita’i, na te le’o fa’amaonia ‘i le taimi nei fa’amatalaga ‘ua o’o atu, pē moni ‘ua tu’uina ‘i luga ‘o ‘upega tafa’ilagi ni ata ‘o ‘i lātou, ‘aemaise le fa’alauiloa au’ili’iliga ‘o fa’amatalaga ‘e fa’atatau ‘ia ‘i lātou ‘uma.

‘Ae ‘o le aso ananafi, na molimauina ai fo’i leisi osofa’iga ‘a malu ‘a le mālō ‘i se tasi ‘o fale’oloa ‘o lo’o fa’agaioi ‘e tagata mai Saina, le kamupanī ‘a le E-Home ‘i Togāfu’afu’a. ‘O le māsina lenei ‘ua maitauina ai le tele ‘o osofa’iga ‘a malu ‘a le mālō ‘i nofoaga ‘ua ‘uma ‘ona lisi ‘e le matāgaluega, ‘e ala ‘i rīpoti na tu’uina ane ‘e nisi ‘o le mamalu ‘o le atunu’u ‘i nofoaga ‘o lo’o fa’agaioi ai le tūleiina ‘o le ‘aisa.

IMAGE/ATA: Murray Faivalu