‘E lē ‘o toe mamao ‘ae toe fo’i ‘i le maea ‘o mea tau ‘i pesepesega ma fa’afiafiaga fa’a-Sāmoa Felise Mikaele

‘O le ‘a toe fo’i ‘i le maea ‘o mea tau ‘i pesepesega ma fa’afiafiaga fa’a-Sāmoa, se tasi ‘o fetū pupula ‘o mea tau mūsika ‘a lo tatou atunu’u, Felise Mikaele ‘i se taimi ‘e lē ‘o toe mamao.

Na fa’ailoa lenei fuafuaga ‘e le Afioga iā Asuao Lealaitagomoa Felise Mikaele, ‘i se talanoaga fa’apitoa ma le Si’ufofoga ‘o le Laumua ‘i le vaiaso nei.

Saunoa Asuao, “o lea lava ‘e maua le mālosi … ‘ātonu lava pe ‘e lē ‘o toe mamao a se taimi ‘ae toe oso … ‘oute nofonofo a ma fatufatu nai pese … ‘e maua fo’i loa le avanoa, toe tu’u ‘i luga nai pese … talosia ‘i le alofa ‘o le Atua ‘ia fa’a’umi’umi ai pea le tūlaga lea ‘ua iai, ‘auā ‘o lea ‘ua savali le 75 ma le lua vaiaso le matua lea ‘ua iai”

‘O lenei tamāli’i ‘ua lausilafia ‘e lo tatou atunu’u ‘i le telē ‘o lona sao ‘i fātuga ma pesepesega ‘e aofia ai vi’ivi’iga ‘o nu’u ma āfio’aga.

Na fa’amāvae āloa’ia mai le faiva ‘o pese ma fa’afiafiaga ‘i nai tausaga ‘e le’i mamao atu, ‘ona ‘o tūlaga tau le soifua mālōlōina.

Peita’i sa ia fa’aālia, ‘o lea ‘ua alofagia ‘e le Ali’i lona mālosi ma ‘ua ‘amata ‘ona toe galue ai mō nisi ana fātuga fou.

Sa tā’ua fo’i ma fa’amamafaina ‘e le Afioga ‘iā Asuao ‘i lenei talanoaga, lona matuā lē fiafia ‘i tagata ‘o lo’o fa’aaogāina le atamai fa’afōliga po’o le AI, ‘e toe fa’atūlaga ai ana pese.

‘O lona manatu, ‘ua tele ana pese ‘ua fa’aleagaina ai, ‘ona ‘e pei ‘ua sui ai le fa’a’upuga ‘aemaise ‘o le gagana ‘ua ‘aumai ai ‘i le AI.

‘O le ‘atoāga ‘o le talanoaga lenei ma Asuao, ‘o le ‘a mafai ‘ona fa’afofoga iai ‘i se taimi lata mai ‘i le ‘au’aunaga ‘a le Si’ufofoga ‘o le Laumua.

IMAGE/ATA: Murray Faivalu / SCR (Audio: SCR)