Fa’asolo vāega fa’ai’u ‘o gaioiga ‘a le ‘Ōfisa ‘o Faigā Pālota mo le silia ‘i le 6,000 ‘o ‘i lātou ‘e le’i pālota ‘i le faigā pālota tele

‘Ua fa’agāsolo nei le la’asaga mulimuli ‘a le ‘Ōfisa ‘o Faigā Pālota, ‘i le silia ma le 6,000 ‘i lātou ‘ua fa’amauina, ‘i le lisi na resitala ‘ae le’i pālota ma ‘i lātou fo’i sa tatau ‘ona pālota ‘ua agava’a ‘ae le’i pālota fo’i ‘i le pālota tele ‘ua mavae atu.

‘O ‘i lātou ia ‘e silia ma le 6,000 ‘ua tu’u ‘iai le avanoa ‘e susū ane ai ‘i le ‘ōfisa se’ia fa’ailoa māfua’aga na lē pālota ai, ma ‘ia toe faia ai se fesuia’iga pe ‘āfai ‘o lo’o talafeagai ‘i ni tūlaga lē ma’alofia na afua ai ‘ona lē fa’atinoina la lātou pālota. ‘Ae pe ‘āfai ‘ae lē susū ane ‘i lātou ‘i le vala’auga mulimuli lenei, ‘o le ‘a tu’uina ai loa le fa’asalaga tupe ‘e pei ‘ona ‘ua ‘uma ‘ona aiaia, ‘e $100 mo le tagata na resitala ‘ae le’i pālota ‘ae $2,000 mo le tagata ‘e le’i resitala ‘ae lē pālota fo’i. Pe ‘āfai ‘ae lē fa’atinoina fo’i lenei tūlaga, ‘o le ‘a fa’ase’e atu loa o lātou suafa ‘i lalo ‘o le tūlāfono ‘e faia ai lo lātou fa’ai’uga.

IMAGE/ATA: Murray Faivalu