Āsia ‘e le Afioga ‘i le Palemia alo ma fānau ‘a le atunu’u ‘o lo’o galulue ‘i galuega fa’avaitaimi ‘i Niu Sila

‘E le’o se taimi muamua lenei ‘ua malaga asiasi ai le ta’ita’i ‘o le atunu’u ‘e feiloa’i atu ma fa’ailoa nisi ‘o vāega ‘o fesuia’iga ‘i galuega fa’avaitaimi, ‘i alo ma fānau ‘o lo’o galulue ‘i atunu’u ‘i fafo pei ‘o ‘Ausetālia ma Niu Sila.

Lea fo’i ‘ua malaga ai le Afioga ‘i le Palemia, le Afioga La’auli’alemālietoa Polata’ivao Fosi Schmidt ma lana ‘aumalaga, le Afioga ‘i le Minisitā ‘o le Matāgaluega ‘o Pisinisi, Ālāmanuia ma Leipa, le Afioga ‘ia Fata Ryan Schuster, fa’apea fo’i ma le ‘Ōfisa Sili ‘o le pūlega ‘ia Fepulea’i Roger Tole’afoa ma sui ‘o le matāgaluega ‘o le MCIL, ‘e āsia ‘i lātou ‘o lo’o galulue ma fa’amautū ‘i Napier, Wellington ma Blenheim ‘i Niu Sila.

‘O le manatu ‘o le Afioga ‘i le ta’ita’i ‘o le atunu’u ma le ‘aumalaga, ‘e lē gata ‘ina ‘ia feiloa’i atu ai ‘i alo ma fānau ‘e fa’amālosi’au ‘ia ‘i lātou, ‘ae tāpā se feiloa’iga ma ‘i lātou ‘e ana fa’ato’aga ‘o lo’o galulue ai ‘e fa’atalanoa nisi ‘o matā’upu. ‘Ua iai nisi ‘o suiga fou ‘o faiga fa’avae ‘i le ‘auai ‘o Sāmoa ‘i nisi ‘o polokalame fa’avaitaimi, ‘e pei ‘ona ‘ua māe’a ‘ona pāsia ‘e le kapeneta.

IMAGE/ATA: Government of Sāmoa