‘Ua maua taui sēleni mo alo ma fānau ta’a’alo ‘a le atunu’u na maua pine mai le 2023 ma le 2026
‘O lea fa’ato’a maua taui sēleni mo alo ma fānau, na mau pine mai ta’aloga ‘a le Pasefika na faia ‘i Solomona ‘i le 2023. ‘O se ta’iala sa fa’ata’oto muamua ‘e le faigāmālō ‘i tua atu, na fa’amālosia fo’i ‘e le faigāmālō talu ai, peita’i ‘e le’i maua ni taui sēleni mai ia taimi, ‘a’o lea ‘ua fa’ataunu’uina ‘i le vaiaso lenei.
‘Na saunoa le ta’ita’i ‘o le atunu’u, ‘e fa’atāuaina ‘o le sao, ‘o agava’a, tāleni ma meaalofa ‘a alo ma fānau ‘o lo’o fai ma ‘ave fu’a ‘a lo tātou atunu’u ‘i ta’aloga fa’avā ’o mālō. ‘Ua fa’aaluina ai le $190,000 ‘e fa’atupeina ai taui sēleni mo ‘i lātou ‘uma na maua pine fa’atasi ai ma faiā’oga. Na saunoa le Afioga ‘i le Palemia, “Ia fa’aosofia ‘i tama ta’a’alo ‘uma ‘a Sāmoa ‘o lo’o iai le tāleni, ‘ia tulitulimatāgau lau galuega ma lou vala’auina, tainane lau tāleni ‘e manuia ai ‘oe, lou ‘āiga, ‘aemaise se igoa ta’uleleia ‘o lo tātou atunu’u”.
Ma ‘o le agaga fa’afetai fo’i na momoli ‘e le Afioga ‘i le Peresetene ‘o le ‘Asosi ‘o Ta’aloga ‘a Sāmoa po’o le SASNOC, Tu’aopepe Jerry Wallwork, ma na tu’itu’i atu ai pea mo nisi ‘o tausaga ‘ua ‘uma ‘ona polōmisi mo ni taui tau sēleni mo alo ma fānau, “E tele fo’i nisi ta’aloga na ‘ausia tūlaga maualuluga ‘i tausaga ‘ua tuana’i, ‘e pei ‘o le 2024 ma le 2025, ma ‘e iai le talitonuga ‘o lea ‘ua ta’oto se ālāfua aupito sili ‘ona lelei, ‘e āmana’ia ātili ai le tautua matavela ‘a alo ma fānau ‘a Sāmoa mo Sāmoa”.
Pei ‘ona silafia, ‘e 35 pine ‘auro na manumālō ai le ‘au ‘a Sāmoa ‘i ta’aloga ‘a le Pasefika ‘i le 2023, ma ‘o le taui sēleni ‘ua māe’a ‘ona fa’atūlagaina, ‘e $2,000 ‘i le pine ‘auro ‘e tasi ma le $1,000 mo le faiā’oga, ‘ae mo ‘au to’atele ‘e sili atu ‘i le to’atasi, ‘e $4,000 ma le $1,000 ‘a le faiā’oga. Ma ‘ua fa’apēnā fo’i ‘ia ‘i lātou na tausiniō ‘i le tausaga lenei ‘i ta’amilosaga ‘o le ta’aloga pi’i ma le si’isi’i u’amea mamafa lea sa talimālō ai lo tātou atunu’u.
IMAGE/ATA: Samoa Association of Sports and National Olympic Committee Facebook