Tōlaulauina le fa’ai’uga mo molimau ‘e to’a 51 na lē usita’ia le fa’amasinoga ‘e tūtūla’i mo le matā’upu ‘a Faleālili 1

‘O lea ‘ua māe’a ‘ona tōlaulau le fa’ai’uga mo molimau ‘e to’a 51 na lē usita’ia le fa’atonuga ‘a le fa’amasinoga, ‘e tūtūla’i ‘e molimau mo le matā’upu ‘a Faleālili 1. ‘E to’a 27 lea ‘ua mōlia nei ‘i le lē usita’ia ‘o le poloa’iga, to’a 17 ‘ua fa’asalaina ‘e totogi le ta’i $500.00 ma le to’a 9 ‘e totogiina le $200.00, ma ‘a tu’ufa’atasia lenei sala tupe ‘e o’o atu ‘i le $10,300.00 ‘o le ‘a o lātou totogiina atu ‘i le ‘ōfisa ‘o fa’amasinoga.

‘O le isi to’atasi ‘o ‘i lātou na mōlia, ‘o le tinā ‘ia Fa’amotu Letia Seutafatafa, ‘e ui ‘o lo’o fa’amaonia fo’i lana solitūlāfono, ‘ae ‘ua lēai se fa’asalaga na tu’uina atu ‘iai ‘e le fa’amasinoga ‘ona ‘e gasegase. Ma ‘ua fa’atonuina ai ‘e le fa’amasinoga ‘i lātou ‘uma nei, ‘ia o’o atu ‘i le aso 12 ‘o Aokuso, ‘ua māe’a ‘ona totogi ‘uma sala tupe ‘ua fa’atūlagaina mo ‘i lātou ta’ito’atasi.

Vāganā ai leisi to’a 23 ‘o ‘i lātou nei ‘ua fa’alēaogāina ‘uma a lātou moliaga ‘ona ‘e le’i lava molimau ‘e fa’asaga ‘ia ‘i lātou, ‘ae ‘ua fa’amauina ‘e le fa’amasinoga, ‘o le to’atasi ‘o ‘i lātou nei ‘e 51 ‘ua maliu, ‘a’o leisi to’atasi ‘e le’i o’o ‘iai le tusi samania.

‘O leisi to’alua ‘o ‘i lātou sa manatu le fa’amasinoga sa tatau ‘ona aofia ‘i le to’a 51, peita’i ‘e ‘ese matā’upu ‘o lo’o su’esu’eina ai ‘i la’ua nei. ‘Afai ‘ae fa’amaonia gaioiga fa’asolitūlāfono na o la’ua fa’atinoina, ‘o le ‘a tu’uina atu ai loa moliaga fa’asolitūlāfono ma ‘o le ‘a tu’uina atu fo’i le kopi tusitusia ‘o fa’ai’uga mo ‘i la’ua ia ‘e silasila ‘iai le Lōia Sili.

IMAGE/ATA: Nessani Lam Sam