Fefa’asoaa’i sui mai Sāmoa, Niue, Tokelau ma Cook Islands ‘i faiga fa’avae mo pūlega ‘e tali atu ai ‘i a’afiaga ‘o matā’upu tutupu fa’afuase’i

‘E tolu aso ‘o se fonotaga ‘o lo’o ‘auai mai ai sui mai Tokelau, ‘o le Atu Kuki, Niuē fa’atasi ai ma sui ‘a Sāmoa, ‘e fefa’asoaa’i ‘i tūlaga ‘o pūlega ‘e tali atu ai ‘i a’afiaga ‘o matā’upu tutupu fa’afuase’i, ma ‘o le ‘auga ‘o le fa’amoemoe, ‘o le lumana’i manuia ‘a so’o se atunu’u.

Na saunoa le Afioga ‘i le Minisitā Lagolago ‘o le Matāgaluega ‘a le Palemia ma le Kapeneta, le Afioga ‘ia Vui ‘Ī’īga Sione ‘Ī’īga, ‘o le manulautī fo’i lea ‘a ta’iala ‘o le ātina’e ‘a Sāmoa po’o le Pathway for the Development of Sāmoa, ‘ina ‘ia fa’amautūina le nofo lelei, saogalēmū ma le sa’olotoga ‘o tagata ‘uma. ‘O le fa’amamafa ‘a le mālō, ‘o le tapu’e, ūna’ia ma ātina’e tomai ma agava’a ‘a o tātou tagata nu’u, ‘e fa’aitiitia ai a’afiaga ‘e pei ‘o le mativa ma le ola fālōlō. ‘O le ‘auga ‘o lenei fa’amoemoe, ‘ia maua ‘e tagata ‘uma avanoa tutusa ma ‘i lātou ‘o lo’o soifua ‘i se soifuaga mā’ale’ale, ‘aemaise ‘o le mafai ‘ona maua ‘o agava’a ‘e ātina’e ai o lātou loto’ifale.

‘O le taimi muamua lenei ‘ua tu’u fa’atasia ai se fa’asoa tāua fa’apēnei, ma ‘e manatu le mālō ‘e tāua le tapena mamao atu, ‘aemaise ‘o le mautū ‘o fuafuaga ma faiga fa’avae ‘e tali atu ai ‘ini mea tutupu fa’afuase’i ‘e ono lamatia ai le soifua manuia ‘o tagata ma le tamao’āiga ‘o atunu’u.

IMAGE/ATA: Government of Samoa