Fa’aauauina faigā pā’aga ‘a Sāmoa, Niu Sila ma ‘Isarā’elu

‘E silia ‘i le 30 ‘āiga, ā’oga ma nisi ‘o ‘ēkālēsia ‘ua fa’amanuiaina ‘i leisi fesoasoani ‘a le mālō ‘o Niu Sila, ‘ua o lātou foa’iina mai ai mōlī ‘e ola ‘i le mālosi’aga ‘o ‘ave ‘o le lā, fa’apea ma le fesoasoani ‘a le mālō ‘o ‘Isarā’elu ‘e ala ‘i ‘ōgāumu ‘e 15 ma vāega ‘e pu’eina mai ai le kesi ‘e alu ‘i otaota lafoa’i. ‘O nei fesoasoani ‘e tali atu ai  ‘i talosaga ‘a nisi ‘o ‘āiga na fa’aui atu ‘i le Matāgaluega ‘o le Si’osi’omaga ma Puna’oa Fa’alenātura.

‘O le afioga ‘i le Igoamatua, le Minisitā ‘o le Matāgaluega ‘o Si’osi’omaga ma Puna’oa Fa’alenātura, na fa’afetaia ia mālō ‘e lua ‘i fesoasoani ‘ua tali atu ai ‘i talosaga na tu’uina mai. “E ‘avea ai fo’i lenei avanoa ‘e momoli atu ai le agaga fa’afetai ‘i le mālō ‘o Niu Sila mo mōlī ‘e alu ‘i le lā, ‘aemaise ai le mālō ‘o ‘Isarā’elu mo biogas ‘e 15. ‘E lē fa’agaloina fo’i le agaga fa’afetai ‘i āfio’aga, ā’oga aemaise ‘o ‘ēkālēsia mo le lava papale mai pea, ‘a’o feagai le matāgaluega ‘e sā’ili le fesoasoani mo lenei fa’amoemoe tāua”.

‘O fesoasoani ‘a mālō ‘e lua lea ‘ua tu’uina mai, ‘o lo’o taula’i ‘uma atu ‘i le sini ‘e tasi, ‘o le puipuia lea ‘o lo tātou si’osi’omaga.

IMAGE/ATA: Ministry of Natural Resources and Environment Samoa Facebook