Toe tāpena le itūmālō Vaimauga 3 mō lana faigāpālota la’ititi lona lua

‘O le ‘a toe alo atu fo’i nei le Itūmālō Vaimauga 3 ‘i le isi ana faigāpālota la’ititi, ‘o le lona lua ai lenei talu mai le faigāpālota tele ‘i le 2025.

‘O le matā’upu lenei na āfua mai ‘i le fa’aī’uga ‘a lē na manumālō mai le faigāfilifiliga ‘iā ‘Aukuso 2025, le Afioga ‘iā Tai’oali’iseu Fiti Aima’asu ‘ina ‘ia tūla’i ‘ese mai le vāegafa’a’upufai ‘a le HRPP lea na pale mai ai ‘i le Palemene, ‘ae fa’ase’e atu ‘i le itū ‘o le Mālō le FAST.

Peita’i, ‘i le māe’a ai ‘o le faigāpālota la’ititi ‘a le itūmālō ‘i le Aso 1 ‘o Mē 2026, na faiā’ina ai le Afioga ‘iā Tai’oali’iseu, ‘i lē sā ‘umia le nofoa ‘i le paeā’iga 17 ‘o le Palemene, le Afioga Lautimu’ia Afoa Uelese Va’ai.

Mulimuli ane, na ‘ave le tagi ‘a le Afioga ‘iā Tai’oali’iseu ‘i le Fa’amasinoga ‘o Faigāpālota, ‘e tu’uā’ia ai le Afioga ‘iā Lautimu’ia ‘i faiga fa’atōsina ma le fa’aālatua ‘i le taimi ‘o le pālota, ma na fa’aulu ai fo’i le tagi ‘a Lautimu’ia, ‘e tu’uā’ia ai fo’i Tai’olali’iseu.

‘I le lauliliuina ai nei ‘o le matā’upu ‘e le Fa’amasinoga ‘i le asō, na fa’amāonia ai mōliga ‘o sui ‘uma ‘e to’alua, le Afioga ‘iā Lautimu’ia fa’apea Tai’oali’iseu ‘i faiga fa’api’opi’o, ma ‘ua lē agava’a ai ‘i lā’ua ‘uma, ‘e toe tauvā ‘i le faigāpālota la’ititi, ma se isi faigāfilifiliga ‘a le atunu’u mō le 10 tausaga, ‘e pei ‘ona aiā’ia ‘e le Tūlafono ‘o Faigāpālota 2019.

IMAGE/ATA: Parliament of Samoa