Filifilia le Afioga ‘iā Vui Clarence Nelson ma Komesina mō Sulufa’iga ‘a le Mālō Sāmoa

‘Ua filifilia le Afioga ‘iā Vui Clarence Nelson, ma Komesina mō Sulufa’iga ‘a le Mālō Sāmoa.

Na fa’atū le lafo ‘a le Afioga ‘i le Palemia le Susuga ‘i le La’aulialemalietoa Polata’ivao Fosi Schmidt ‘i le fa’ai’uga ‘o le fonotaga ‘a le Palemene ‘i le pō ‘o le Aso Tofi, ‘i le māe’a pāsiaina ai ‘o le Tala Fa’atatau ‘Autū ‘o le Tupe 2026/2027, ma na saunoa fa’asilasila ai lea tofiga fa’alefa’avae ‘a le Mālō, mō le ‘Ofisa ‘o le Komesina ‘o Sulufa’iga ‘a le atunu’u, le Office of the Ombudsman | National Human Rights Institution.

‘O le Afioga ‘i le Ta’ita’i ‘o le Itū Agai Hon. Tuilaepa Dr. Sailele Malielegaoi, na tūla’i ‘e talifaitau ‘i le lafo ‘a le Mālō, ‘e lagolagoina lea tofiga, ma na fa’amaonia ai ‘le Palemene le tofiga ‘o le Afioga ‘iā Vui Clarence Nelson ma Komesina mō Suiufa’iga.

‘O le Afioga ‘iā Vui, ‘o se tamāli’i ‘e lē toe taufa’ailoa lona sao mō le atunu’u, ‘e ala ‘i lona soifua tautua ‘o se Fa’amasino Sīnia ‘o le Fa’amasinoga Mauāluga ‘a Sāmoa, lea na mālōlō litaea mai ai ‘i lea vala’auina ‘i lenei vaiaso, ‘i le silia ma le 26 tausaga.

‘O le Aso Faraile 26 ‘o Iuni 2026, ‘e fa’atautō ai le Afioga ‘iā Vui ‘i lea tofiga, ma ‘amata galue ai mō le Komisi mō Sulufa’iga ‘a le atunu’u.

‘O le ‘Ofisa ‘o le Komesina ‘o Sulufa’iga (Ombudsman) ‘o se fa’alāpotopotoga fa’aletūlafono ‘e tūto’atasi mai le Mālō, ma sa fa’avaeina muamua ‘i lalo ‘o le Tūlafono ‘o le Komesina ‘o Sulufa’iga 1989.

‘I lalo ‘o lenei tulafono, ‘e feagai le ‘Ofisa ma matā’upu ‘e fa’atatau ‘i pulega lelei (good governance), ‘e aofia ai le su’esu’eina ma le fō’ia ‘o faitioga ‘e uiga ‘i gaiōiga fa’afoe, fa’ai’uga, po’o ni tūlaga sa lē faia ai ni gaiōiga ‘a matāgaluega ma ‘ofisa ‘a le Mālō ‘o Sāmoa.

IMAGE/ATA: SCR (file).