Fesiligia le fa’atinoina ‘o su’esu’ega mō fuāla’au fa’asāina mō Sui Faipule ‘o le Maota

‘Ua fesiligia ‘i le fonotaga ‘a le Palemene ‘i le taeao nei le fa’asilasilaga ‘a le Afioga ‘i le Fofoga Fetalai Hon. Auapaʻau Mulipola Aloitafua ‘i le tolopō ai ‘o le fono ‘i le pō ‘anapō, na fa’asilasila ai le fa’atinoina ‘o su’esu’ega ‘o Sui Faipule ‘uma ‘o le Maota, ‘i le aso fono lenei.

‘Ae sa tūla’i le Afioga ‘i le Sui ‘o Lotofaga, le Afioga ‘i le Sa’o Fa’apitoa Hon. Fiamē Naomi Mata’afa ‘e fesiligia ai, po’o se faiga ‘e fa’amālosia (poloā’iga), pē faia ‘i le loto malie ‘o le Sui Faipule le su’esu’ega mō fuāla’au fa’asāina.

Sa tūla’i fo’i le Afioga ‘i le Sui Ta’ita’i ‘o le Itū Agai, Hon. Fonotoe Pierre Lauofo, ‘e fesiligia ai tūlafono, ‘o aiā tatau ‘o tagata, ‘aemaise le fa’atinoina ‘o su’esu’ega fa’afuase’ia (random drug testing).

Peita’i na saunoa le Afioga ‘i le Ali’i Palemia, Hon. La’aulialemalietoa Polata’ivao Schmidt ‘e fa’aalia ai lona lagolagoina ‘o le fa’atinoina ‘o lea fa’amoemoe, ma fa’aleo lona fa’anoanoa, ‘e fōliga mai ‘e lē lagolagoina ‘e sui, le tau tete’e atu ‘i le fa’afītauli ‘ua ōgaōga nei ‘i le atunu’u ‘i fuāla’au fa’asāina.

‘I le māe’a ai ‘o felafolafoā’iga ‘i lenei matā’upu, na saunoa manino ai le Afioga ‘i le Fofoga Fetalai, ‘e fa’atinoina pea su’esu’ega ‘i le asō mō Sui Mamalu ‘uma ‘o le Palemene.

IMAGE/ATA: Screengrab / Parliament of Samoa