Silia ma le 10,000 tagata Sāfata ‘e maua taui ta’i $1,100

E 10,457 le aofa’i o tagata o le Itumālō o Safata o le a maua taui ta’i $1,100 e pei ona fa’amaonia mai e le Komiti Faufautua mo A’afiaga i le Gataifale ma le Komiti o Fa’alavelave Tutupu Fa’afuase’i ma Matuiā.

I le feiloā’iga a le Komiti ma Tusitala | Ofisa Fa’asalalau, sa fa’ailoa manino ai e le Komiti nisi o galuega fa’atino a le Matāgaluega o Tupe e mata’itū ai uma vaega mo’omia, a’o le’i tu’uina atu nei vaegātupe i tusi tupe a tagata o le Itumālō.

Sa fa’aali manino e le Ta’ita’ifono o le Komiti, Afioga iā Fui Tupa’i Mau Simanu, o le galuega sa fa’atinoina e pei ona aga’i atu ai le aufaigaluega i Safata, ma aumai ai le fuainumera e 8,989, peita’i ina ua toe iloilo e le aufaigaluega ma tula’i mai ai loa le fuainumera o tagata o le ā maua lea taui e 10,457.

O le 10,457 o tagata e pei ona fa’ailoa e le Komiti e 1,225 le aofa’i o maliega na maua mai ai, ae o le aofa’iga o maliega ua mae’a ona saini ma fa’amaonia e 957, ae o le aofa’iga o maliega ua tu’uina atu i le Matāgaluega o Tupe e 746.

Saunoa Fui, ua to’atele ua fesiligia le tulaga e pei ona taoto ai taui nei mo le Itumālō o Safata.

“O le fa’atinoga o le galuega e tatau ona māioio lelei vaega uma e mo’omia e fa’amatu’u atu ai i tua seleni.

“Ona o le to’atele o nisi o ‘āiga e leai ni ā latou tusitupe, aemaise fo’i pe afai na’o fanauiti e le’o i ai se isi o i ai se teugātupe.

“E tatau fo’i ona tilotilo le Komiti i le tulaga e fa’amaonia ai po’o le teugātupe a ai lea o le ā fa’amatu’uina atu ai seleni a ‘āiga ia, ina ia mautinoa latou te maua lea taui.

“Mo se fa’ata’ita’iga, afai o le teugātupe a Simi lea o le ā teu i ai taui a tagata e to’a tolu pe to’a fitu, e tatau lava ona maioio ma fa’amaonia e sa’o lelei.

Sa fa’ailoa fo’i e le Komiti e le’o aofia ai i latou o lo’o fa’atino pisinisi tau tagata tafafao maimoa mai fafo i totonu o le Itumālō i taui nei.

“O lo’o i ai le Pulega o Tagata Tafafao Maimoa mai Fafo [S.T.A.], o le vaega lea o lo’o nafa ma le fa’atinoga o le galuega mo pisinisi ia.

O le S.T.A. lea e fa’amatu’u atu i ai le taui o le $10 Miliona e aga’i i ai pisinisi e ‘ave fa’amaumauga ma fa’ailoa vaega o latou pisinisi o lo’o a’afia ona o le goto ai o le va’a o le Manuao o le Manawanui i le gataifale o le Itumālō.

Ua fa’ailoa mai ai fo’i e le Ta’ita’ifono o le Komiti le taui e lē i lalo ifo o le $4 miliona lea e maua e le afio’aga o Siumu.

“O le ā i ai se taimi e fono ai le Komiti mo le fa’atalanoaina o lea fuafuaga mo Siumu.”

Tusia ‘e: Taunuuga Toatasi (Savali Newspaper)

CAPTION: Fui Tupa’i Mau Simanu, CEO
Ministry of Works, Transport, and Infrastructure Samoa
IMAGE/ATA: Government of Samoa