‘E le’o fa’amuamuaina Māori ma Pasefika fa’apea tupulaga ‘i fesoasoani mō le māfaufau

‘E le’o fa’amuamuaina Māori, tagata Pasefika fa’apea ma tupulaga, pe ‘ā o’o ‘i avanoa ‘e maua ai le fesoasoani mō le soifua mālōlōina ‘o le māfaufau pei ‘ona fa’ailoa ‘i se rīpoti fou ‘e ui ‘ua manino ‘i ni mau lo lātou mo’omiaina ‘o se isi lagolago ‘i luga atu.

Na tā’ua ‘i le rīpoti ‘a le Komisi mō le Soifua Mālōlōina ‘o le Māfaufau ma le Ola laulelei, ‘e to’aitiiti lava tagata ‘o lo’o mafai ‘ona maua ‘au’aunaga muamua mō le tausiga ‘o le soifua mālōlōina ‘o le māfaufau, ma ‘e lē’o ō tutusa fo’i le fa’atupega ‘o ia ‘au’aunaga ma tupe ‘o lo’o ‘ave ‘i isi ‘au’aunaga ‘o le soifua mālōlōina ‘o le māfaufau.

‘E na’o le 29 pasene ‘o Māori ia ‘e maua le avanoa ‘i ‘au’aunaga fa’apitoa, lātou te fa’aaogāina ‘au’aunaga Māori, ‘ae ‘ua fa’aopoopoina lava le lē talia po’o le lē maua ‘o ni avanoa ‘o tupulaga talavou mō fōma’i fa’apitoa pe ‘ā fa’atonuina ‘e va’ai ‘au’aunaga fa’apitoa. 

‘Ua fa’aalia ‘i fa’amaumauga ‘a lea rīpoti, le pito mauāluga ‘o le aofa’i ‘o ē māliliu ‘e māfua mai ‘i le pule ‘i le ola, ‘i ali’i Māori ‘ua ta’i 25–44 tausaga le mātutua. ‘Ua mātauina fo’i le tele ‘o avanoa ‘e taofia ai Māori ma tagata Pasefika ‘i potu fa’a’esea (solitary confinement), fa’apea le fa’atuputupula’ia pea ‘o le tu’u ‘o tupulaga talavou ‘i fale ‘e tausia ai gasegase mātutua ‘o lo’o taofia ‘i totonu ‘o falema’i, mā ‘e ono tūla’i mai ai ni tūlaga lamatia ‘o lo lātou saogalēmū.”

Link to RNZ (Article): https://www.rnz.co.nz/news/health/598351/maori-pacific-people-and-youth-not-prioritised-in-mental-health-support

ATA: LDR / Alice Angeloni (RNZ).