‘E ono fa’asala ‘i le oti Sāmoa ‘e to’alua ‘i Vietnam
‘I luga ‘o fa’asalalauga ‘a le RNZ, ‘ua tā’ua ai ‘e fa’apea, ‘ua fa’amaonia ‘e Leoleo ‘a Fiti, na ui atu ‘i le malae va’alele fa’avāomālō ‘a Fiti, taulele’a ‘e to’alua Sāmoa ia na ta’utino ma o lā molimau ‘i le fa’ao’oga ‘o le oti ‘i le ta’ita’i ‘o le kegi ‘a le Coconut cartel, ‘o Lorenzo Lemalu.
Na ta’utino ‘e Joseph Va’a 27 tausaga le matua ‘i luga ‘o televise ‘a Vietnam, lona fanaina ‘o Lorenzo Lemalu, ‘i fafo ‘o le fale’aiga ‘i Ho Chi Minh City ‘i le aso 21 Me. ‘O Steve Tofa, 23 tausaga po’o Tafia ‘i nisi ‘o fa’asalalauga, na ia ta’utino lona fesoasoani ‘i lea gāioiga.
Na maliu ai lava Lorenzo ‘i le mea na fanaina ai ‘e tusa ai ma līpoti, ‘ae ‘o Sauni Sam 27 tausaga ‘o lo’o ‘i le potu mō gasegase tīgāina ‘i le falema’i. Na līpotia ‘e fa’apea, ‘e iai le talitonuga, ‘o Lorenzo ‘o le ta’ita’i ‘o le Coconut Cartel ‘i Sini ‘Ausetālia.
Na fa’aalia ‘i luga ‘o le RNZ ‘e le so’o’upu ‘a leoleo ‘a Fiti, Ana Naisoro, ‘o taulele’a ia ‘e to’alua, na ui atu ‘i Fiti, na fa’aaogāina ai o lā tusifolau Sāmoa. Peita’i, ‘e le’i tali Naisoro, ‘e fa’amaonia ni fa’amatalaga ‘a nisi ‘o ‘au’aunaga fa’asalalau ‘e fa’apea ‘ua iai vāega ‘ua soli ai le puipuiga ma le saogalēmū, lea na fa’ato’ā maua ‘ina ‘ua fa’ailoa ma fa’asoa mai ‘i le matāgāluega ‘a Fiti ‘e va’aia le puipuiga ‘o tuā’oi, ‘e lālā ‘e fa’amālosia le tūlāfono ‘i atunu’u ‘i fafo.
‘O lo’o tā’ua ‘i fa’amatalaga ‘a vāega fa’asalalau ‘e fa’apea na fa’aaogā ‘e taulele’a ni tusifolau pepelo ma ni igoa sesē, ‘i le malae va’alele fa’avāomālō ‘i Nadi ‘i Fiti. ‘Ua lipotia ‘ua gālulue vāvālalata le ‘Ofisa ‘o Leoleo ma le ‘Ofisa ‘o Femalāgā’iga ‘i le taimi nei fa’apea ma leoleo fa’avāomālō, ‘e aofia ai le Interpol, ‘e su’esu’e ‘uma gāioiga ‘a taulele’a ‘e to’alua ‘i le taimi na nonofo ai mō se taimi pu’upu’u ‘i Fiti.
Na fa’aalia ‘e Dr Ben Mostyn, ‘o se faiā’oga sinia ‘i le Iunivesite ‘o Sini ‘i le Morning Report ‘a le RNZ, ‘e ono feagai taulele’a nei ma le fa’asalaga ‘i le oti ‘i lalo ‘o le tūlāfono ‘a Vietnam. Na ia fa’aalia fo’i, ‘e tete’e mālō ‘o ‘Ausetālia ma Sāmoa ‘i fa’asalaga ‘i le oti ma ‘e mafai ‘ona taumafai ‘e fa’alavelave ‘i le matā’upu.
‘E lē to’atele ni tagatānu’u ‘Ausetālia na fa’asala ‘i le oti ‘i Asia ‘i Saute Sasa’e ‘i taimi ‘ua tuana’i ‘e ui ‘i ni taumafaiga fa’avāomālō. Na iai le talitonuga ‘i le taimi muamua, ‘o taulele’a ia ‘e to’alua, ‘o ni tagātā nu’u ‘Ausetalia peita’i ‘i ni ripoti ‘a le 7News na tā’ua ai, na o lā fa’aaogāina ni tusifolau pepelo ma igoa pepelo, ‘o Lang Kenny Trong Minh do ma Justin John White ‘e malaga ai ‘i Vietnam. Na taofia ma lokaina ‘i le tuā’oi ‘o Cambodia, lua po’o le tolu aso mulimuli ane mai le taimi na fa’atino ai le solitūlāfono.
‘Ua fa’aalia ‘i ni pepa ‘o fa’amatalaga na mafai ‘ona māua ‘e le RNZ Pacific, le tu’uina atu ‘o se poloā’iga fa’anatinati ‘a le transnational crime unit ‘i le Faletupe Tutotonu ‘o Sāmoa ‘i le Aso Lulu, ‘e poloka ai ni teugātupe se 6 ‘e iai le so’otaga ma ē ‘o lo’o aofia ‘i le matā’upu lea na tupu ‘i Vietnam. Na vave ai ‘ona fa’atonuina ‘e le Kōvana ‘o le Faletupe, Maiava Atalina Ainu’u-Enari faletupe ina ia taofia teugatupe ‘a Va’a ma Tovia fa’apea ai ma teugatupe ‘a ni tagātānu’u Niu Sila se to’alua ma se tagata sitiseni Amerika ma se tagata Thailand. ‘E iai fo’i se faleta’avale po’o se car rentals ‘i Vaitele ‘ua līpotia ‘o lo’o āga’i ‘i ai ni su’esu’ega ‘i lea lava matā’upu.
Link to RNZ (Article) translated: https://www.rnz.co.nz/news/pacific_samoa/596702/samoan-nationals-could-face-death-penalty-over-coconut-cartel-killing-of-sydney-gang-leader-in-vietnam
ATA: 7News Australia.