Fa’afetai tele Sāmoa ‘i lau tapuā’iga ma talosaga leoleoa; P.M. La’aulialemalietoa

I le toe taliu manuia mai i Samoa, o le si’igā – gasegase a le afioga i le Palemia, Susuga i le La’aulialemalietoa Leuatea Polāta’ivao Fosi Schmidt i Niu Sila mo le lua vaiaso, na ia momoli ai lana fa’afetai fa’apitoa i le tapuā’iga leoleoa, a’o talosaga molipō a le atunu’u atoa.

Saunoa le Ta’ita’i o le Mālō;

“I lo’u agaga fa’aaloalo, ou te momoli atu ai le fa’afetai tele i la outou nofo tatalo ma le tapuā’iga, o lea ua toe fa’afo’isia le malosi, ma le fautuaga e tatau lava ona mata’itū taimi faigaluega, o taimi mālōlō, aemaise o tulaga i le tausia lelei o le soifua mālōlōina.

“Ma e fa’amauina ai le agaga o le fa’afetai tele i le tapuā’iga mau a Samoa atoa, le pa’ia i lo tatou Mālō, aeā le pa’ia i le ‘au fai tatalo ma le Ekalesia, aemaise fo’i o le atunu’u atoa, i tafa e fia o Samoa, le afifio o ali’i ma faipule, le pa’ia lava lea auā Tama ma o latou ‘Āiga, o ‘Āiga fo’i ma latou Tama, le Usoga a Tumua ma Pule, Itu’au ma Ālataua, ‘Āiga i le Tai ma le Va’a o Fonotī.

“O lea ua toe taunu’u manuia mai i fanua, ua atoatoa le malosi, a’o le itu sili ona tāua, e ao ona fa’amamafa e so’o se tagata soifua, e sili lava le puipuia i lo le tau togafitia, o le alafua lenā e tausi ai lo tatou soifua mālōlōina.

“I tafa e fia o le lalolagi na nofo tatalo ma tapuā’ia le fa’amoemoe na aga’i atu i ai, vi’ia le Atua, o lea ua toe fa’afo’isia lo’u malosi, e i ai lava le talitonuga o faiva e tapuā’ia, o faiva na e manuia.”

Ua toe fa’aauau nei tiute masani o le afioga i le Palemia, e pei ona sa tau’ave ai e le afioga i le Sui Palemia iā Mulipola Anarosa ‘Ale – Molio’o i le lua vaiaso ua mavae atu.

Tusia e: Pesetā Tusiga Taofiga

ATA: Lopajoyce Fiti / Savali Newspaper.