3 pisinisi tumā’oti ua galulue ma le mālō i le auina atu o fanau i galuega fa’avaitaimi
O lo’o tumau pea aiaiga fa’avae mo le filifilia o i latou e agava’a mo galuega fa’avaitaimi i Niu Sila, Ausetalia ma Amerika Samoa, tauala mai lea i le filiga a ali’i ma faipule o afio’aga ta’itasi, i le fa’amalu a Ofisa o Fono Fa’avae a Itumālō Palota e 51 i le atunu’u.
Sa tu’u talaloa lava le galuega lenei i le talosaga a so’o se tasi e fia malaga i nei galuega fa’avaitaimi fa’apitoa lava i ‘ai latou e le’o i ai ni galuega i Samoa.
Ui o lea, o le alia’e o le tele o fa’afitauli ma lu’itau ogaoga, ua ma’imau ai ma soifua o nisi, ona o le solia o tulafono ma faiga fa’avae o nei galuega, ua manatu ai le Mālō, ina ia toe fa’atulaga lelei nei galuega, ma ia fili tupe toa, le tōfā ma le moe i nu’u ta’itasi, e iloilo ai po’o ai e tatau ona āoga i ai le Polokalama, ia lē gata e āoga mo ia, ta’uleleia lona ‘āiga, a ia sili ai ona malu Samoa i le tulaga fa’avāomālō.
Ua molimauina, e i ai fo’i nisi ua latou fa’aāoga fa’apisinisi le auina atu o nei fanau mo galuega fa’avaitaimi i na atunu’u, ma ua fa’ailoa manino ai e le Mālō, ua na’o le tolu lava Auaunaga Tumā’oti i Samoa, e feagai ma le filifilia o i latou nei, ‘ese mai i le aiaiga ua i ai nei tauala mai i Ofisa o Fono Fa’avae.
O ia Kamupanī Tumā’oti, ua loa tausaga o latou fa’atinoa lea auaunaga mo tatou tamafanau, ma ua 100% fo’i i ai le talitonuina e le Mālō, o le amiotonu, moni, sa’o ma atoatoa o le fa’atinoga alofa o le latou galuega faifaipea mo se manuia o nai a tatou tagata.
O ia Pisinisi po’o Recruitment Agents e aofia ai;
- Pacific Work Force Group Limited
- Poutasi Development Trust
- Taimalie Charlie Ah Liki Westerlund
O ia Kamupanī Tumā’oti, o le ā galulue fa’atasi ma le Matāgaluega o Pisinisi, Ālamanuia ma Leipa [MC.I.L.] i le filifilia o isi fanau e agava’a mo nei galuega fa’avaitaimi.
Ma e $10,000 le seleni e tatau ona totogi e ia Pisinisi i le M.C.I.L. ona fa’atoā mafai lea ona fa’atino lenei auaunaga tāua.
O lona uiga, e leai, leai lava nisi Pisininsi Tumā’oti, e faia lea auaunaga se’i vaganā ai ua toe i ai fo’i se isi fa’atanaga aloā’ia mai le Kapeneta.
Ae mo Itumālō Palota, e $1,000 le tupe e tatau ona totogi e le Itumālō i le Mālō, fa’atasi ai ma le $50 a le ali’i po’o le tama’ita’i ua mautinoa o le ā malaga.
Saunoa le afioga i le Sui Palemia, iā Mulipola Anarosa ‘Ale – Molio’o, e talatala manino lenei lava faiga ua i ai nei, e fa’apea;
“O Kamupanī nei, ua leva ona galulue i le auina atu o tatou fanau i galuega fa’avaitaimi i Niu Sila ma Ausetalia.
“E aga’i mai le Faigāmālō, o lo’o tele ina ta’ape i tua le filifiliga o i latou e mafai ona malaga i galuega nei, ma sa maitauina ai, le si’itia pea o fa’alavelave e tutupu mai e a’afia ai le soifua o nei fanau, fa’atasi ai ma le solia o tulafono o galuega fa’avaitaimi.
“O lea sa taga’i ai le Mālō, ma fa’amautū ai loa le tu’uina atu i le Pulega Mamalu a Ali’i ma Faipule o Itumālō ta’itasi, tauala atu i Ofisa o Fono Fa’avae, latou te filifilia mai fanau e agava’a mo nei galuega fa’avaitaimi, ina ia mautinoa o i latou ua tofia, e amio lelei, e amio pulea, e nofomau i le nu’u, ma iloa ona tausi i tulafono ua fa’ata’oto mo ia galuega.
“A ia silisili ai ona faigofie i le Mālō, ona toe fe’utana’i ma Afio’aga ta’itasi i se tasi e fa’aletonu ma amio matagā mai nei galuega, mo ni fa’asalaga talafeagai i ‘ai latou nei ua solia tulafono.
“A omai fo’i la i latou o lo’o fa’afaigaluegaina i latou nei, e aga’i lava i tua i itumālō, e fa’atino ai le filifiliga.
“O le to’atele o fanau o lo’o malaga i nei polokalame, o lo’o maua mai ai lipoti, e i ai nisi o tatou tagata o lo’o faia a latou pisinisi sa’ili tupe fa’asolitulafono i le auina atu o tatou fanau e fa’afaigaluega i nei galuega.
“Ou te fa’ailoa atu, ua tapuni le faitotoa, e na’o le tolu lava auaunaga tumā’oti ua fa’amaonia e le Kapeneta, latou te fa’atinoina auaunaga nei mo tamafanau a Samoa, o lo’o malaga mo sā’iliga manuia o ‘āiga, ma le tautuaina o ekalesia ma nu’u tauala atu i le fa’amalu a lenei Polokalame.”
Tusia e: Taunuuga Toatasi
ATA: Savali Newspaper.