Fa’ase’etuāgalu Toelupe mai ona tofiga o le Sui Palemia ma le Minisitā o le Kapeneta

Ua fa’ailoa aloā’ia i le asō, e le afioga iā Toelupe Maoiautele Poumulinuku Onesemo, lona fa’amavae aloā’ia mai i ona tofiga o le Sui Palemia ma le Minisitā o le Kapeneta mo le taimi nei.

O le i’uga a le Fa’amasinoga o Faigā Palota e tusa o le matā’upu i fa’atosina i le Palota Aoao 2025, na fa’alēāogaina ai le tofiga Faipule o le afioga iā Toelupe.

Peita’i, o le taeao nei, ua fa’ailoa manino e Toelupe, ua toe tu’uina atu lana talosaga i le Fa’amasinoga mo le toe iloiloina o lenei lava matā’upu, auā i lona talitonuga, ua autasi lona Itumālō Palota e fa’aui i tua lea matā’upu, ui o lea, sa talosaga le H.R.P.P. ina ia fa’aauau pea, o le vala lea ua afua ai le fa’ai’uga ua tu’uina mai.

Saunoa manino le Sui Palemia, e le’o se finagalo lea o lona Itumālō lona fa’amavae, e le’o se tōfā fo’i lea i le Palemia ma le Kapeneta, peita’i o lana lava lea fa’ai’uga fai to’atasi, i lona naunauta’iga, ia ‘aua ‘aua lava ne’i tilofia galuega fa’atino a le Kapeneta, ona o lona nofonofo atu i le tālia ai o se tali i lana talosaga, o le ā toe fa’aulu i le Fa’amasinoga.

Ae silisili ai le puipuiga o le mamalu ma le aloā’ia o fa’ai’uga fai a le Mālō e tauala mai i le laulauāfono a le Kapeneta.

Na ia fa’afetaia fa’apitoa le Susuga i le La’aulialemalietoa Leuatea Polāta’ivao Fosi Schmidt, o le Palemia o le Mālō Tuto’atasi o Samoa fa’apea le Vaega Fa’a’upufai a le Fa’atuatua i le Atua Samoa ua Tasi [F.A.S.T.] i le fa’atuatuaga sa tu’uina atu iā te ia, e tau’ave ai nei tofiga mauāluga ma le aloā’ia i Samoa. O se fa’aeaea lava lea i si ona Itumālō Palota fa’apea ai si ona ‘āiga peleina.

Ae fa’asilisili ai lana fa’afetai i le Atua, ona o lona fa’aāogaina pea o lona tagata, e auauna ai i so’o se valā’auina ua tofia ai o ia, e ui i le tele o lu’itau ma fa’afitauli.

Saunoa le Palemia i nisi o feiloā’iga ma Tusitala | Ofisa Fa’asalalau i vaiaso ua mavae, e telē lona fa’atuatuaga ma le talitonuina e le Mālō o le fesoasoani ma le sao tāua o Toelupe i le ta’ita’iga o le sā folau o Samoa.

O sē sa fai ma sili’aga, a’o se tasi na avea ma lima taumatau iā te ia o le Palemia, a’o se’ei ai i le tofiga Sui Palemia | Minisitā o le Kapeneta.

Ta’utino fo’i La’aulialemalietoa, e lē māmā iā te ia ma le Mālō le mea ua tupu, auā o se tulaga e ao ona toe silasila loloto i ai i le Tulafono o Faigā Palota i le lumana’i.

Na ia momoli fo’i fa’amafanafanaga a’o se fa’amalosi’au iā Toelupe ma si ona ‘āiga, e tusa o le tulaga ua tupu mai i le Fa’amasinoga.

Tusia e: Peseta Tusiga Taofiga

ATA: Savali Newspaper