Fa’aauau i le isi lua vaiaso le avanoa mo talosaga o Pine Tauāloa a le Mālō Tuto’atasi o Samoa

E masina atoa, na fa’asalalau fa’alaua’itele ai le tu’uina mai o talosaga i le Mālō mo nisi ua afu le tautua, e tatau ai le fa’aaloalo a le Mālō mo le tu’uina atu o Pine o Tulaga Mamalu ma Fa’ailoga Tauāloa a Samoa e amanaia ai le latou tautua matavela.

Peita’i, e mae’a le taimi na atofa, e na’o le to’a 11 i latou ua talosaga, o se itu, ua manatu le Mālō, e tatau lava ona toe fa’asalalau mo se isi lua vaiaso, ina ia toe fa’aopoopo nisi e talosaga.

O le tatalo a le Mālō, ina ia alofagia, o ai lava so’o se tasi ua niuali lana tautua i so’o se matātā i totonu o nu’u, ekalesia, ta’aloga, ā’oga, sosaiete, fa’alapotopotoga po’o le Mālō fo’i ma atunu’u e mamao, afai o se tagatānu’u Samoa, o le avanoa lelei lenei, e fa’aulu mai lona suafa ina ia ‘ave i ai le fa’aeaea ma le fa’aaloalo mauāluga a le Mālō.

O ni Fa’ailoga Tauāloa, e lē fa’ailoga tagata, e lē fa’apito manuia tasi lenei fa’aaloalo mauāluga a le Mālō, pau le itu tāua, ia mautinoa o lou sao tāua ua o se sao malosi i le tamāo’āiga o le atunu’u lautele.

E i ai tausaga na fa’ae’eina atu ai se tasi o Pine Tauāloa i se tinā, o ia o se matuau’u, ua au tausagā o tautua mo Samoa, e ala i le lalagaina o ie Samoa moni, o se sao ua saga fa’amapu’eina ai pea, le tāua o le fa’aolaola o measina a le atunu’u i lona tulaga aloā’ia ma le mamalu.

O le tatalo a le Komiti Fa’apitoa mo lenei fa’amoemoe, ina ia fa’atāua e o tatou tagata lenei fa’aaloalo mauāluga, afai e le’o silafia e nisi se tautua afu o se tasi i totonu o ‘āiga, nu’u, ekalesia ma Samoa, o le avanoa lelei lenei, e fa’ailoa ai iā Samoa, le mauāluga o le sao o sea tagatānu’u i le atina’ega o le tamāo’āiga o Samoa mo ā taeao.

E tu’uina mai talosaga i le Matāgaluega a le Palemia ma le Kapeneta, ona iloilo toto’a lea e le Komiti Fa’apitoa o lo’o i ai, e aofia ai;

• Akiepikopō iā Mosese Vitolio Tui: Sui o Ekalesia
• Agafili Tomaimanō Shem Leo: Matāgaluega a le Palemia ma le Kapeneta
• Leilua Tutogi Mailei: Sui o Vaega Tumaoti
• Papāli’i Siaosi Hansell: Sui o Ali’i ma Tulāfale
• Victoria Lalomilo: Ofisa Sili Lagolago – Matāgaluega o Tinā ma Tama’ita’i, Atina’e o Nu’u ma Agafeso’ota’i.

O le fa’ai’uga o Aperila, ua ta’oto ai le fuafuaga e tatau ona ‘ave ai se fautuaga i le Kapeneta mo lana fa’amaoniga o suafa o i latou o le ā fa’ae’e atu i ai nei Pine o Tulaga Mamalu ma Fa’ailoga Tauāloa a le Mālō Tuto’atasi o Samoa.

A’o le Aso Lua, 02 Iuni 2026, o le ā fa’ataunu’uina ai le Sauniga Aloā’ia Fa’aleMālō, mo le fa’ae’eina atu o ia Pine Tauāloa i ‘ai latou ua lautogia.

Tusia: Katherine Matuauto

ATA: Leota Marc Membrere / Savali Newspaper