Āmana’ia ma fa’atāua aiātatau ‘a ‘i latou ‘e Logonoa ‘e ala ‘i le a’oa’oina ‘o le Gagana Faitaga

O lenei vaiaso o lo’o fa’atāuaina ai i le lalolagi atoa, le amanaia o i latou e logonoa i so’o se auaunaga.

Mo Samoa lava ia, o le pine o lea Aso Fa’apitoa Fa’avāomālō, le fa’atautaia lea e le Asosi o i latou e logonoa i le atunu’u, o se a’oa’oga mo le tolu aso ma ana pa’aga totino, ina ia mautinoa o lo’o sologa lelei feso’ota’iga i auaunaga ‘ese’ese o lo’o fa’aaofia ai i latou e logonoa i le atunu’u.

O le sini autū o lea fa’amoemoe “E lē atoa se aiātatau pe ā leai se gagana faitaga.”

I le saunoaga autū a le Sui o le Fa’alapotopotoga o Fesoasoani mo Aiātatau a i latou e i ai a’afiaga tumau o le soifua [D.R.F.] i le Pasefika iā Fa’aolo Utumapu – Uta’ilesolo, sa ia ta’ua ai le āoga o le fa’aāogaina o le gagana faitaga e feso’ota’i ai ma i latou e logonoa, e fa’afaigofie ai ona malamalama i so’o se vaega o le olaga nei.

“O le tausaga e 2017 sa fa’avaeina ai le Asosi o Tagata Logonoa i Samoa, ma e tāua tele le mafua’aga na fa’avaeina ai lea Asosi.

“O le naunauta’iga, ia mafai e tagata logonoa ona fa’atino o latou aiātatau e fa’aāogaina ai le gagana faitaga.

“E lē mafai ona tatou ausia le amanaia o aiātatau, pe afai e le’o fa’atāuaina le fa’aāogaina o le gagana faitaga e fa’afaigofie ai feso’ota’iga o tatou nei ma i latou e logonoa.

Na momoli le fa’amālō a Fa’aolo i pa’aga uma a le Asosi ua mafai ona auai atu i lea a’oa’oga, ina ia mautinoa le fa’aauau pea o le galulue fa’atasi ma ia sologa lelei le tulaga o feso’ota’iga pe afai e malamalama lelei i le fa’aāogaina o le gagana faitaga.

“O le fe’au e fia tu’uina atu i a’i latou uma e logonoa, o le fe’au fo’i lea na ou tu’uina atu iā te outou i le valu tausaga ua tuana’i, o le gagana faitaga o lau gagana lea, e tatau ona e nafa ma le atia’e lelei, fa’afailele ma ia fa’aāoga lelei, ae ‘aua le fa’alagolago e alu atu se isi e fa’atino.

I le saunoaga a le afioga i le Peresetene o le Asosi iā Eli Sio, sa ia fa’ailoa ai nisi o fa’afitauli o lo’o feagai pea ma i latou e logonoa.

“O le tulaga i le sā’iliga o galuega, ona o le tele o fale faigaluega, e lē mafai ona fa’aāoga ai le gagana faitaga. O totonu o ‘āiga, nu’u ma ekalesia, e i ai lava i latou e lē malamalama i le fa’aāogaina o le gagana faitaga.

“O le vaiaso nei, o lo’o toe fafagu mai ai iā i matou le tāua tele o le gagana faitaga o lo’o matou fa’aāoga matou te feso’ota’i atu ai i isi. O lo matou fa’asinomaga lea, o la matou aganu’u fo’i lea matou te tiu ai i aso uma o lenei olaga.

“O le naunauta’iga ina ia mafai ona galulue fa’atasi, e le gata o le Asosi ae fa’apea fo’i a matou pa’aga, ina ia mafai ona o’o lenei fa’amoemoe i totonu o fale faigaluega uma ma isi vaega o le atunu’u, ina ia feso’ota’i i so’o se tagata e fa’aāogaina le gagana faitaga.

“A’o tatou i ai i le fa’atāuaina o lenei vaiaso o le fa’atāuaina o le gagana faitaga, ia tatou manatu o lo tatou malosi, e maua mai i le loto gatasi, ae o le aga’i i luma mo se manuia, e maua i le galulue fa’atasi.”

Tusia: Taunuuga Toatasi (Savali Newspaper)

ATA: Taunuuga Toatasi (Savali Newspaper).