Tu’ua ‘e le Palemia le atunu’u mo togafitiga fa’afoma’i i Niu Sila

O le aoauli ananafi, 21 Setema 2025 na tuua ai le atunuu e le afioga i le Palemia – Hon. La’aulialemalietoa Polata’ivao Leuatea Fosi Schmidt mo Niu Sila, e fa’atino ona togafitiga fa’afoma’i mo’omia.

Na fa’amautu i le fa’aiuga o le vaiaso na te’a nei tulaga i foma’i ma togafitiga mo’omia mo le Palemia, ma fa’atino ai le fa’aiuga a le Kapeneta mo le tu’ua ai e le afioga i le Palemia le atunu’u i se taimi vave.

O faiga fa’avae a le Malo, e agava’a le Palemia i siaki ma togafitiga fa’afoma’i i Niu Sila, ma e fa’atupeina atoa e le Malo. Peita’i, ona o le tulaga o lo’o i ai nei vaegatupe a le Malo i le 25% o le Tala Fa’atatau o le Tupe o loo fa’atino ma faagaioi ai galuega a le Malo, ua finagalo ai le Palemia e fa’atupe lava e lona aiga pasese o va’alele, tau o togafitiga i Niusila, ma apitaga mo le Palemia i Niu Sila mo le taimi nei.

O lo’o malaga fa’atasi le Palemia ma lona Faletua, ma o le fuafuaga e to’esea o ia ma le atunu’u mo le vaiaso e tasi.

[OFISA O LE SO’OUPU – 22 Setema 2025]

ATA: Government of Samoa.