Tali le Fofoga Fetalai ‘i ni fa’amatalaga ‘ua fa’aalia ‘e fa’atatau ‘i ona matāfaioi ma lona tūto’atasi

E amanaia e le Ofisa o le Fofoga Fetalai o le Palemene atugaluga ua laga i le tusi lata mai nei i le nusipepa e tusa ai ma le tutoatasi o le Fofoga Fetalai i le faatautaiga o galuega a le Maota, e pei ona lomia i le Observer o le Aso Sa le aso 9 Fepuari 2025. E taua le faamaninoina o matafaioi a le Fofoga Fetalai ma faamalamalama ni tulaga e le o manino ai e tusa ma ou tiute ma galuega.

E talu ai o au o le Fofoga Fetalai o le Palemene, ua matua ou malamalama atoa i au matafaioi tau i le Faavae ma le moomia o le le faaituau i le faatumauina o le tulaga faatuatuaina o le faagasologa o galuega a le Fono Faitulafono. O le manatu e faapea ua ou le gafatia ona faafoe galuega o le Maota i se tulaga e tutoatasi ma le faaituau e le faavaea. O le faatinoga o le galuega ma faaiuga fai e tusa ai ma lou tulaga o le Fofoga Fetalai o loo taitaina e le Faavae ma Tulafono Tumau a le Palemene, ina ia faamautinoa ai o taualumaga uma a le Palemene o loo faatinoina i le amiotonu ma pulega manino.

E tusa ai ma le manatu e filifilia se isi Fofoga Fetalai, e tatau ona toe faamanino e faapea o le toe filifilia o se Fofoga Fetalai o le mataupu lea mo le Palemene e tusa ai ma le Fuaiupu 49 o le Faavae. E le faatonuina e se manaoga o soo se vaega faaupufai, ae ua na o faasologa faa Palemene ua faavaeina. O le tauaofiaga a le Palemene i le aso 21 o lanuari 2025 sa faaiugafonoina ai e faapea o le tulaga i upufai o Malo o loo i ai ua le o se mataupu lea e faia i ai se felafolafoaiga a le Palemene peitai, ua o se faafitauli i le va o se vaega faaupufai. O lona uiga, o le matafaioi a le Fofoga Fetalai e tumau lava lona tutoatasi mai feeseeseaiga o vaega faaupufai ma e taulai tonu lava i le faatumauina o le faatemokarasi a le Palemene.

E fia faaopoopo atu, o tuuaiga sa ou aafia i suegatupe a le vaega faaupufai a le FAST, e ao lava ona tagai i ai i le auala talafeagai. O le avea o au ma sui faipule, sa filifilia au nei e tauala mai i lau vaega faaupufai, ma o lo’u aafia ai i mataupu tau vaega faaupufai ae ou te le i tauaveina le nofoa o le Fofoga Fetalai, sa ou faia lea i luga o ou aia tatau faa sui o le vaega. Peitai ina ua ou seei i le tofiga o le Fofoga Fetalai, o loo ou tumau e tausisia le tauaveina o ou tiute i le le faaituau ma faamaoni. O le eseesega i la’u lagolago mo le vaega faaupufai ma le tauaveina o ou tiute o le Fofoga Fetalai o se mea ua ou tausisia ma le tinou.

O le sologa lelei ma mautu o upufai o Samoa e faamoemoe i le faatuatuaina o ona ofisa e auauna i tagata lautele, ma ou te tautino atu i tagatanuu o Samoa o le faatinoina o lau matafaioi o le Fofoga Fetalai o loo faia i le tulaga maualuga o le tutoatasi ma le le faaituau.

O le Tulafono ma faiga faavae faatemokarasi o loo taulamua i taualumaga faa Palememe, ma o le a ou tumau i le faamautinoaina o le sologa lelei o le Palemene i le tulaga o le a tautua ai mo ona tagata i le tulaga e sili ona moomia. Ou te fautuaina vaega faaupufai ma paaga uma ina ia amanaia le faagasologa o le Faavae o loo puleaina ai la tatou faatemokarasi ma taumamao ma le tauleagaina o le Ofisa o le Fofoga Fetalai i le faapolokiki mo faamoemoega mo se vaega e tasi.

ATA: Parliament of Sāmoa