‘Ua tu’umālō le Afioga ‘i le Senatoa Muāgututi’a Moevasa Tau’oa

by | Nov 20, 2026 | Sāmoa

‘Ua tu’umālō le Afioga ‘i le Senatoa Muāgututi’a Moevasa Tau’oa, ‘o se tasi ‘o tamā sa fa’aaloalogia ma āmana’ia ‘i totonu ‘o le Fono Faitūlāfono ‘a ‘Amerika Sāmoa.

Na fa’aālia ‘e le Peresetene ‘o le Senate, le Afioga Tuā’olo Mānaia Fruean “’o le ‘a misia ‘e le atunu’u lenei tamā sa iai le tōfā loloto ma le silasila mamao.”

Na saunoa Tuā’olo, “A saunoa Muāgututi’a, mātou te fa’alogologo. ‘E lē fa’ata’amilomiloa ana saunoaga, ‘ae sa tautala sa’o ma le fa’amāoni, ma fa’aālia manino ona lagona ‘i matā’upu ma tagata.”

“’E ui ‘ina sa iai nisi sa lē fiafia ‘i a’oā’iga ‘a Muagututi’a, ‘ae ‘o le uiga moni lava lea ‘o le saunoāga ‘a le toeā’ina, ‘e pei ‘o se tamā alofa ‘o lo’o a’oa’i ma fa’atonu lana fānau.”

Na fa’aālia ‘e Tuā’olo, ‘o le ‘a mātuā misia ‘e ia ma afioga ‘i Senatoa ‘uma fautuaga tāua ma le tōfā loloto ‘a Muāgututi’a.

‘O le afioga ‘i le Senatoa Muāgututi’a, sa ‘avea ma se tasi ‘o tamā sa fīnau mālosi mō le fa’atūmauina ma le puipuia ‘o tu ma aganu’u fa’a-Sāmoa, fa’apea le gagana Sāmoa.

Sā lē finagalo ‘o ia ‘e fa’aaogā ‘e fa’atonu ma isi ‘ōfisa ‘o le mālō le gagana peretānia pe ‘a tu’uina atu ā latou molimau ‘i luma ‘o komiti ‘a le Fono Faitūlāfono.

‘I taimi ‘o iloiloga mō le fa’amaoniaina ‘o tofiga ‘o fa’atonu ‘o matāgaluega ‘a le mālō, sā masani ‘ona fa’atusa ‘e Muāgututi’a ‘i latou ‘ua filifilia ‘e ‘avea ma fa’atonu ‘i manufēlelei ‘o le fuāmanu, ‘o ē sā ‘auina atu ‘e sa’ili le poto ma le atamai, ma ‘ua toe taliu mai ‘e tautua le atunu’u.

Sā ia fa’amanatu atu fo’i, ‘ua o’o i lō latou taimi ‘e tau’ave ai le ta’ita’iga ma le tautuaina ‘o tagata lautele ‘o Tutuila ma Manu’a.

‘O le afioga ‘i le Senatoa Muāgututi’a Moevasa Tau’oa, sa tautua ‘i lona nofoā’iga lona tolu lenei ‘a’o ‘avea ai ma Senatoa mo le itūmālō ‘o Sua Nūmera 2.

‘E mōmoli atu ai fa’amaisega ma alofa’aga fa’amāoni ‘i le ‘āiga ma fānau ‘i le tu’umālō ‘o le Afioga ‘i le Senatoa Muāgututi’a Moevasa Tau’oa.

IMAGE/ATA: SCR / Murray Faivalu