Tapena le ‘au usufono ‘a Sāmoa mo le fonotaga ‘a mālō ‘o le taupulega

‘Ua potopoto le ‘aumalaga ‘a Sāmoa ‘e tāpenapena le ‘auai ‘i le fonotaga ‘a ta’ita’i ‘o mālō ‘o le taupulega po’o le CHOGM, ma le fa’amoemoe ‘e fia fa’aauauina pea measina ‘a Sāmoa lea sā iai ‘i le taligāmālō ‘i le 2024, ma fa’amālosia ai faigā pā’aga ‘e maua ai āvanoa mo tātou tagata.

‘O le Afioga ‘i le Sui Palemia, Mulipola ‘Anarosa ‘Ale Molio’o, ‘o lo’o ta’ita’ia le ‘aumalaga ‘e suia ai le Afioga ‘i le Palemia. ‘Ua iai fo’i le fa’amoemoe ‘o le ‘a tu’uina atu ‘e Sāmoa le tofiga ‘o le ta’ita’i fono po’o le Chairman ‘o le fonotaga ‘a ta’ita’i ‘o le mālō ‘o le taupulega, ‘iā Antigua ma Barbuda.

‘E pei ‘ona silafia, ‘o le taligāmālō ‘a Sāmoa ‘i le fonotaga ‘i le 2024, na filifilia ai le Palemia ‘o le atunu’u ‘i lenā vaitau, le Afioga Fiamē Nāomi Matā’afa, ‘e saofa’ia le nofoa ‘o le ta’ita’i fono ma ‘o faiga māsani ‘o fonotaga ‘a ta’ita’i nei ‘o mālō ‘o le taupulega, ‘e 2 tausaga le mālō ma fa’ase’e atu ‘i isi atunu’u. ‘O se taimi muamua fo’i lea, na ta’ita’ia ai ‘e se atunu’u pito la’iitiiti ‘o le pasefika ia fonotaga ‘a le CHOGM.

IMAGE/ATA: Government of Samoa Facebook