Rīpotia le maliu ai ‘o se tinā Filipino ‘i le ‘Āmau Apartments

‘Ua fa’aauauina su’esu’ega ‘a le Matāgaluega ‘o Leoleo, ‘i le matā’upu na rīpoti atu ‘i le vaveao ‘o le Aso Sā ‘i le fa’ai’uga ‘o le vaiaso, ‘i le maliu ai ‘o se tinā Filipino 39 tausaga le matua ‘o le soifua, lea ‘o lo’o tā’ua ‘i fa’amaumauga ‘a leoleo, na toe maua ane ‘e lona to’alua ‘i le vaveao lea, ‘ua maliu ‘i totonu ‘o lō lā potu, sa fa’amautū ai ‘i sē tasi ‘o potu totogi ‘i totonu ‘o le taulaga.

‘O le tinā Filipino ‘iā Frimrose Castro, ‘o se tinā ‘ua tele tagata Sāmoa lātou te silafia, ‘ona ‘o sē tasi lea ‘o su’isu’i lelei ‘i totonu ‘o le atunu’u, ma ‘ua tele tausaga ‘o galue ‘i lana pisinisi lenei ‘i totonu ‘o Sāmoa. ‘I rīpoti mai sē tasi ‘o pā’aga fa’amoemoeina, ‘o le potu totogi lenei ‘i luga ‘o le pisinisi ‘a ‘Āmau Apartments ‘i Apia, sa fa’amautū ai ma fa’aauau ai le lā pisinisi, ma na fa’ato’ā me’i atu ‘iai la lā pisinisi, ‘i le māsina ‘o Sētema, ‘ina ‘ua fa’atau ‘ese le nofoaga sā iai muamua.

‘O le tasi lenei ‘o tino maliu ‘o lea tinā Filipino ‘iā Frimrose, ‘ua tu’uina atu ‘i lalo ‘o su’esu’ega ‘i ta’otoga fa’apitoa ‘o maliu lilo ‘a le Matāgaluega ‘o Leoleo.

IMAGE/ATA: Nessani Lam Sam / SCR