Mautinoa le ‘auai ‘o le Manu Sāmoa ‘i le Ipu ‘o le Lalolagi 2027

‘O se ‘aiga ‘i le fa’ai’uga ‘o le vaiaso ‘a le mālō ‘e fa’afeiloa’ia ai le mālō fa’aaloalogia, le afioga ‘i le ta’ita’i fono ‘o le komiti fa’atonu ‘o le Lakapī ‘i le Lalolagi ‘iā Dr. Brett Robinson, ‘ina ‘ua malaga mai ‘e fa’amautū nisi ‘o tūlaga, ‘e lē gata ‘o le tāpenaga ‘a le ‘au ‘a le Manu Sāmoa mo le Ipu ‘o le Lalolagi ‘i le 2027, ‘ae fa’apēnā fo’i le matā’upu ‘o lo’o fefālōa’i ai nei le ta’ita’iga ‘o le Lakapī Sāmoa, po’o le Iuni Lakapī ‘a le atunu’u.

‘I lea taligāmālō ‘a le ta’ita’i ‘o le atunu’u ma sui ‘o le kapeneta, na ‘auai ai fo’i ma le Iuni Lakapī fou lea ‘ua māe’a fa’atūina, ma le ta’ita’i fono ‘a le Lakapī Sāmoa, le tōfā Namulau’ulu Sami Leota.

‘I le saunoaga ‘a le Afioga ‘i le ta’ita’i ‘o le atunu’u, “[The] World Cup has been committed to Sāmoa all these years. They provide, fund equipment, technical assistance and all that, ma ‘e tāua lenā mo ‘i tātou. This is the home of professional rugby in the world, Sāmoa”. ‘O le tūlaga ‘ua ta’oto ai nei le matā’upu, ‘ua fa’amautūina lava le iai ‘o le ‘au ‘a le atunu’u ‘i le ta’amilosaga ‘o le Ipu ‘o le Lalolagi ‘i ‘Ausetālia ‘i le 2027.

‘Ua ‘ese mai le ‘au ‘a le atunu’u mai le tūlaga fa’apēnei na ta’oto ai ‘au ‘a atunu’u ‘o Pāpua Niu Kini ma Fiti, na fa’amuta ‘e le Fa’alāpotopotoga ‘o le Lakapī ‘o le Lalolagi, ‘ina ‘ua iai le so’otaga ma faiga fa’apolokiki.

Peita’i ‘o le ‘au ‘a Sāmoa, ‘a’o le’i tūla’i mai fe’ese’esea’iga, na muamua mautinoa lona āvanoa ‘i le ta’amilosaga ‘o le Ipu ‘o le Lalolagi. Ma ‘o se vāega ‘ua āmana’iaina ai ‘e le ta’ita’i fono ‘o le Komiti Fa’atonu ‘o le Lakapī ‘o le Lalolagi, le tautīgā ‘o alo ma fānau ‘a le atunu’u, ‘ua saofagā ‘i lea āvanoa.

Peita’i, ‘o lo’o fa’aauau pea ‘ona āmana’ia ‘e le fono fa’atonu ‘a le Lakapī ‘o le Lalolagi le Iuni ‘a le Lakapī Sāmoa ‘i le taimi nei.

IMAGE/ATA: Government of Samoa Facebook