Saunoa le Afioga ‘i le Sui Palemia ‘i le fonotaga ‘a ta’ita’i ‘o mālō tetele ‘o le lalolagi

‘Ina ‘ua tu’uina atu le āvanoa ‘i le Afioga ‘i le Sui Palemia ‘o Sāmoa, Mulipola ‘Anarosa ‘Ale Molio’o ‘i le fonotaga ‘a ta’ita’i ‘o mālō tetele ‘o le lalolagi, ‘e saunoa ai ‘i lana saunoaga ‘autū, na ia ūna’ia ai le fa’alauiloaina ‘o mana’oga ‘o fa’avae, tutusa ‘o āvanoa ma le fa’atāua pea ‘e Sāmoa ‘o le usita’ia ‘o tūlāfono fa’avā’omālō, ‘e puipuia ai atunu’u lāiti tau ātia’e ‘i lō lātou si’omia lea ‘o le sami, ne’i tūla’i mai le lē āmana’ia ‘e mālō tetele ‘o le lalolagi.

‘I lana saunoaga ‘i le fono lona 81 ‘o fono aoao ‘a mālō ‘aufa’atasi ‘i le aso 25 Sētema, na ia fa’ama’oti ai matā’upu fa’avae ‘e iai le fa’amasinoga tonu mo le tau, ma ia ūna’ia ai le tūlaga āmana’ia ‘e mālō tetele ‘o lo’o āfāina ma a’afia vave ai le si’osi’omaga ‘o le tau, ‘ina ‘ia taulāmua ‘i lātou, ‘i le fesoasoani atu ‘i tūlaga tau ‘i sēleni ‘e lāvea’iina ai atunu’u lāiti ‘o le pasefika.

‘E lē gata ‘i lea, ‘o le suiga ‘o tūlaga ‘o ātina’e tau tupe, na fautuaina ai ‘e Sāmoa le fa’anatinati ‘o le fa’atuputeleina ‘o fesoasoani tau tupe mo fesuia’iga ‘o le tau, ‘e aunoa ma ni tu’utu’uga faigatā ‘e tu’uina ‘iai. Na ia fa’amālosia ai fo’i le vāega ‘ua tā’ua ‘o le MVI po’o le Multidimensional Vulnerability Index, ‘o le fa’ailoa lea ‘o le tūlaga mā’ale’ale ‘i tūlaga ‘ese’ese.

‘O polokalame mo le manuia ‘o tagata, ‘o leisi lea vāega na talanoaina ‘e le Afioga ‘i le Sui Palemia ‘i le fa’amanatuina lea ‘o galuega fa’aloto’ifale, na ia fa’asino ai ‘i taumafaiga ‘a Sāmoa lava ia, ‘e pei ‘o le polokalame ‘o ātina’e ‘o itūmālō, ā’o’oga fua ‘i iunivesitē ma ā’oga maualuluga fa’apea ma le ‘alauni mo le manuia ‘o fānau, na ‘avea ‘o sana fa’ata’ita’iga ‘o le fa’atinoina lea ‘o tautoga fa’avā’omālō ‘ina ‘ia manuia le va’aiga mo tagata lautele.

IMAGE/ATA: Government of Samoa Facebook