Fesoasoani le mālō ‘i le toe fa’aleleia ma le fa’atūmauina ‘o le lelei ‘o māta’aga ‘o tala fa’asolopito ‘a Sāmoa

‘Ua manatu le Ta’ita’i ‘o le atunu’u ma lana Kapeneta ‘i lana asiasiga ta’amilo ‘i le motu tele ‘i Salāfai, ‘ina ‘ia toe āsia lava vāega ‘o tala fa’asolopito ‘a le atunu’u, sa fai ma māta’aga ‘a tagata maimoa tāfafao mai atunu’u ‘i fafo, ‘e maimoa ma fa’alogologo ‘i tala tu’u ‘i fofoga ‘e tua’ā ‘o le atunu’u ‘ua lagomau mai ti’asā, ‘a’o le’i o’o mai le talalelei ‘i o tātou lau’ele’ele.

‘O le āfio’aga ‘o Faleālupo Tai ‘o lo’o tele ‘iai tala ‘o le vavau, ‘e ala ‘i nisi ‘o pine fa’amau ‘o lo’o fa’amanatuina ai ia tala tu’u, lea ‘ua toe teuteuina ma toe fa’aleleia. ‘O nei māta’aga ‘e aofia ai le Tūlaga vae ‘o Moso, le Fafā ‘o sauali’i, Vai sua toto, Ana ‘o Va’atausili, Paepae ‘o ‘Apa’ula, ma le Malaefono ‘o aitu.

‘Ua fesoasoani le mālō ‘e tauala atu ‘i le Pūlega ‘o Tagata Tāfafao Maimoa mai ‘i le atunu’u po’o le Tūrisi, ‘e toe teuteu ma toe fa’aleleia ia māta’aga ma fa’asalalau fa’alaua’itele ‘i le lalolagi, ‘ina ‘ia asiasi tagata tūrisi mai isi atunu’u ma maua ai sēleni ‘a ia fo’i āfio’aga.

‘I lea asiasiga ‘ua tatalo atu ai fo’i le Āfioga ‘i le Palemia ‘i ia āfio’aga, ‘ina ‘ia fa’atūmauina le matagōfie ‘o pine fa’amau nei, ma ‘ia mautinoa ‘e tūmau le mamā ‘auā tūrisi ‘e asiasi atu, fa’atasi ai ma o tātou lava tagatānu’u ‘ua leva ‘ona aumau ‘i fafo, ‘ae ‘ua toe āsia Sāmoa.

IMAGE/ATA: Government of Samoa Facebook