‘Āmata fa’ata’ita’i ‘e le Matāgaluega ‘o Ā’oga se metotia fou ‘i le a’oa’oina ‘o fānau ‘e fa’aaogāina ai ‘upega tafa’ilagi

‘O le fa’ai’uga ‘o le vaiaso na fa’ata’ita’i ai ‘e le Matāgaluega ‘o Ā’oga, leisi ana metotia fou ‘e tali atu ai ‘i le fa’afītāuli ‘ua fai si ‘umi ‘ona fa’aauau pea, ‘o le tu’uitiitia lea ‘o faiā’oga ‘i totonu ‘o ā’oga ‘uma ‘i le atunu’u, ‘ātoa ai ma le tasi ‘o le faiā’oga ‘ae ‘ua o’o atu ‘i le 40 – 50 tamaiti ā’oga ‘i totonu ‘o se potu ā’oga ‘e tasi.

‘O le metotia fou lea ‘ua fa’ata’ita’i ‘e le Matāgaluega ‘o Ā’oga, sa fa’atautaia lea mai le ā’oga tūlaga lua ‘a Ā’ele ‘ua fa’aaogāina ai ‘upega tafa’ilagi, ‘e fa’atino mai ai vasega ‘e le faiā’oga ‘e tasi, ‘ae koneti atu ‘iai vasega ia ‘e le ‘o iai ni faiā’oga ‘o le vasega lea ‘e tasi, mai ā’oga ‘o isi ā’oga. ‘O le faiga lea sa fa’ata’ita’i ai mai le Vasega 6, ma ‘ua manatu le Matāgaluega ‘o Ā’oga, ‘o se metotia fou ‘e iai lona tāua ma ‘o le ‘a fō’ia ai le fa’afītāuli ‘o le telē ‘o le mana’oga mo faiā’oga.

Na fesiligia le pule ā’oga ‘o se tasi ‘o ā’oga tūlaga lua ‘i le taulaga ‘i Apia, ‘i le metotia fou lea ‘ua fa’aaogāina ‘e le Matāgaluega ‘o Ā’oga, na ia fa’ailoa ai lona lagolagoina ‘o lenei metotia fou. Pau le tūlaga, ‘āfai loa ‘e sōloga lelei ma manuia, ‘e tatau ‘ona toe silasila le matāgaluega ‘i ia faiā’oga, ‘ina ‘ia si’itia sina fa’aopoopoga ‘i ō lātou totogi, ‘ona ‘o le ‘a tasi ‘o ia, ‘ae ‘o le ‘a ia a’oa’oina ni vasega se 8 pe 9 ‘i le taimi ‘e tasi.

IMAGE/ATA: Ministry of Education and Culture Facebook