Fa’aauau su’esu’ega ‘i le fa’amālōlō lē tūmau ai ‘o sui sīnia e to’alua mai le Matāgaluega ‘o le Soifua Mālōlōina

‘Ua fa’ase’e atu le matā’upu mo ‘i lā’ua ‘e to’alua sīnia mai le Matāgaluega ‘o le Soifua Mālōlōina, ‘ina ‘ia fa’atino ‘iai su’esu’ega ‘a le ‘Ōfisa ‘o Komisi ‘o Tagata Faigaluega ‘a le Mālō. ‘O ‘i lā’ua ia ‘e to’alua ‘ua fa’amālōlō lē tūmau nei, ‘o le Sui ‘Ōfisa Sili ma le Sui sīnia ‘a le matāgaluega ‘e na te va’aia le vāega ‘e utuina ai fagu kesi ‘okesene.

‘E 45 fagu kesi na tā’ua ‘e le Minisitā ‘a le Matāgaluega ‘o le Soifua Mālōlōina, ‘e le’i logoina ai le Pule Sili ‘i le taimi na utuina ai ma ‘ave’eseina ma le vāega na kiliva ‘iai. Mulimuli ane ‘i su’esu’ega na fa’atino, ‘o ia fagu kesi ‘uma sa ‘ave āga’i ‘i le Matāgaluega ‘o le Fuimū.

Peita’i ‘o lo’o tē’ena fo’i ‘e le Pule Sili ‘o le Fuimū, Tanuvasa Pētone Mauga se faiga fa’asolitūlāfono na ‘auina atu ai ia fagu kesi. ‘E pei ‘ona ia fa’ailoa, ‘o fagu kesi ‘o lo’o ūia lava ‘auala māsani, ‘i pepa ‘e fa’atauina atu ai ‘i le nofoaga ‘e ‘auina ma kiliva atu ai ia fagu kesi, ‘ua na’o le soifua mālōlōina. ‘O lo’o ‘ūmia fo’i le pepa ‘e fa’amaonia ai, sa fa’atauina ia fagu kesi ‘ae le’i ‘auina atu ‘i se ‘auala fa’asolitūlāfono. ‘I le fa’atalanoaga ‘a Tanuvasa ma le TV1 na ia fa’ailoa ai, “E lē solitūlāfono lā pe ‘a fa’apea ‘o lea ‘e te māua na iai le purchase order ‘a le pūlega na ‘ave ‘iai.”

Pau le tūlaga ‘o lo’o fesiligia ‘e le Minisitā ‘o le Soifua Mālōlōina, ‘āfai ‘o lea sā fa’atauina ‘i ‘auala talafeagai ma fa’atūlāfonoina, ‘aiseā na lē logoina ai pei ‘o tūlaga māsani, le ‘Ōfisa Sili ‘o le Pūlega ‘o Soifua Mālōlōina ‘i ia fefa’ataua’iga.

‘O se tasi lea ‘o matā’upu ‘o lo’o fa’asolo nei ‘iai su’esu’ega ‘a le ‘Ōfisa ‘o le Komisi ‘o Tagata Faigaluega ‘a le Mālō.

IMAGE/ATA: Savali Newspaper Facebook